Ulloriaaqqap nunarsuarput sanioqqutissagaa

Ulloriaq angalasoq qitermigut kilometerit ataatsimik isorartussuseqarpoq, nunarsuarmullu aatsaat taama qanitsigisumik sanioqquttoqassalluni.

Ulloriaaqqamik angalasumik nunarsuatsinnut kingullermik taama qanitsigisumik saneqquttoqarmat 2004-mi septembarimi pivoq.

Ulloriaararlu angalasoq nunarsuatsinnut ulorianaateqarsinnaasoq, Amerikamiut avataarsualiartitsisarfiata NASA-p ilisimatitsissutigaa.

- Aseruatiternerit annertoorujussuussagaluarput, Michael Linden-Vørnle, avataarsua pillugu Danmarks Tekniske Universitetimi fysikeri oqarpoq.

- Nunarsuarmi aningaasarsiornikkut ilungersunartorsiorneq annertooq kingorna pissaaq, avataarsua pillugu fysikeri Ritzauimut oqarpoq.

Annilaangassutissaqanngitsugulli, NASA oqarpoq. Ulloriaaraq angalasoq 2014 JO25-mik atserneqarsimasoq, nunarsuatsinnit 1,8 millionit kilometerinik ungasitsigaluni sanioqqutissaaq.

Assigiinnarpaa qaammat ungasissusaa tallimariarlugu.