Assit: Birgittep Kullorsuarmi mingutsitsineq tupaallaatigigaa
Eqqakkkat anartarfiillu puussiarsuisa seerisut tikki ima Birgitte Møldrupimut narlunngunartigisimapput, allaat Kullorsuarmi ullut sisamat sulinerminut angalareerluni Upernavimmukareernermini ullut marluk naamasimallugit.
Kullorsuarmimi uissuummissutigeqisaminik nunaqarfiup aqquserngisa sinaanni eqqakkangarpassuit takusimavai, taakkualu aamma tikki naajussorsimallugit, taamatullu aamma anartarfiit puussiarsui seerisut nunaqarfimmi takussaasimaqaat.
- Oqaasissaaleqinarporluunniit. Tupinnarpoq takullugu nunaqarfik taama eqqagassaqartigisinnaammat tipeqarujussuarlunilu, Birgitte Møldrup, Kullorsuarmiit Nuummut utereernermini Naalakkersuisunut Avannaata Kommunianullu meeqqat Kullorsuarmi eqqagassarpassuaqarnerata kinguneranik atugaat pillugit nalunaaruteqarpoq.
AAMMA ATUARUK Kullorsuarmi mingutsitsineq: Eqqaavilerisut Ilulissaniit tikisinneqalerput
Kullorsuarmiileqqaarami takusaminut ima tupigusutsigisimavoq eqqarsaqqaarsimagaluarni qanoq iliuuseqarniarnani.
Assiliisoq: Birgitte Møldrup
Eqqakkanik saliinermit katersat angisuut, angerlarsimaffinnit ulluinnarni igitat aamma anartarfiit puussiarsui nunaqarfimmi takussaasimapput. Taakkualu aamma tikki narlanngunarluinnartut.
Meeqqat seerisut akornanni pinnguartut
Pisuttuarnermili ilaanni meeqqat aqquserngup eqqaani pinnguartut takulersimavai. Aqquserngullu sinaaniissimapput angerlarsimaffinnit eqqakkat puussiarsuarniittut aamma anartarfiit puussiarsui, imaminnit seerisoorlutik tikkaarissut.
- Kisianni meeqqat takuleriarakkit, uangalu nammineerlunga silaannarmik taassuminnga niaqorlukkama, taava eqqarsaatigilerpakka meeqqat, Birgitte Møldrup tassani meeqqat Kullorsuarmi atugai pillugit nalunaaruteqarniarluni aalajangersimasoq, taama oqaluttuarpoq.
Naalakkersuisunut kommunimullu nalunaarutini sapaatip akunnera siuliani pingasunngornermi nassiuppaa.
- Nalunaarutinni ersarissarpara nalunaaruteqarniaaannarlunga nalunaaruteqanngitsunga, kisianni eqqaaveqarnermut avatangiisinullu tunngasunut atassuteqartoq. Ersarissarniarsimavaralu ernumaninni meeqqat aamma pineqarmata, oqarpoq.
- Meeqqammi pisinnaatitaaffeqaraluarput eqqissillutik eqqiluitsumik avatangiiseqarlutik pinnguarsinnaanissaminnut. Tamakkuali tamarmik Kullorsuarmi eqqagaqarpallaarnera pissutigalugu killormuanik pipput, Birgitte Møldrup Kullorsuarmi eqqakkat katersuinnarneqartut pillugit takusani pillugit suli oqaasissaalatsisoq oqarpoq.
- Meeqqat anartarfiit puussiarsuisa seeriffiisa sanianni pinnguaramik arlannguat oqarpallappoq: - Ilaa, tipi?
- Paasisinnaavara uanga taamannak oqarmat. Taakaniikkamami tipeqaruttormat Upernaviliarama ulloq siulleq tullialu naamasuusivakka. Misinnarluni soorluli tipi atisannut aamma sorlumma iluanut nippussimasoq.
Eqqaavilerisoq soraarsimasoq
Kullorsuarmi nunaqarfimmi aqutsisut siulittaasut, Beathe P. Greve, KNR-imut nassuiaavoq Kullorsuarmi eqqakkat aamma anartarfiit puussiarsuisa katersorneqartarsimannginnerat nunaqarfimmi namminersorluni eqqaavilerisup soraarsimaneranik pissuteqartoq.
Assiliisoq: Birgitte Møldrup
Kisianni Beathe P. Grevep oqaluttuaraa innuttaasut ataasiakkaat nammineq piumassutsiminnik iliuuseqarlutik Pilersuisumit traktorinik angisuunik qaluutalinnik atoriarlutik eqqakkat puussiarsuillu Kullorsuup eqqaavissuanukaassimagaat.
AAMMA ATUARUK Lossepladser bugner af skrald i Avannaa: Nu brænder kommunen det af
Tamannalu Akigssiak` G. Larsenip eqqortuunerarpaa. Taanna Attaveqaatinut, Sanaartornermut Avatangiisinullu Ingerlatsiviup Upernavimmi nunaqarfiinillu immikkoortortaqarfiani akisussaasuuvoq. Kommunilu maanna namminersortumik eqqaavilerisussarsiorpoq.
- Sulisartunik nalunaaquttap-akunnermusialinnik eqqaavilerisoqarallarlutalu anartarfilerisoqarallarpugut. Kisianni coronap nalaani sulisut nalunaaquttap-akunnermusiallit sulerisoriinnarnissaat ajornakusoorsimavoq, oqarpoq.
Avannaata Kommunia kommunip eqqaavissuaqarfiini ammaannartumik ikuallaasarnissaminut immikkut akuersissummik tunineqarnikuuvoq.
Akuersissut juunip 18-aniit qaammatit pingasut ilanngullugit atuuffeqarpoq.
