Assartuineq pillugu isumalioqatigiissitaq: Kangerlussuaq Nuummut nuulli
Assartuineq pillugu isumalioqatigiissitap nalunaarusiaa utaqqineqarsimaqisoq tallimanngornermi isumalioqatigiissitap siulittaasuanit Christen Sørensenimit saqqummiunneqarpoq. Inassutigineqartullu ilagaat imarpik ikaarlugu mittarfiit pingaarnersaat Kangerlussuarmiit Nuummut nuunneqassasoq. Tassani tunngavilersuutigineqarpoq imarpik ikaarlugu ilaasut amerlanersaasa Nuummeersuunerat.
- Imarpik ikaarlugu mittarfiup Nuummut nuunneqarnissaata imminut akilersinnaanissaanut tunngaviusoq ataaseq pingaaruteqarluinnarpoq Kangerlussuup matuneqarnissaa. Uani mittarfiit taakku marluullutik ingerlaannarnissaat periarfissaanngilaq, assartuineq pillugu isumalioqatigiissitaq taama inassuteqarpoq.
Taamatuttaaq ippoq kujataanut imarpik ikaarlugu timmisartuussineq pillugu. Assartuineq pillugu isulioqatigiissitat inassutigaat Narsarsuaq matullugu Qaqortumi imarpik ikaarlugu mittarfiliortoqassasoq taannalu 1.799 meteriusinnaasariaqassasoq. Taama inassuteqarput kujataaniit imarpik ikaarlugu ilaasut amerlanersaat Qaqortumeersuummata.
Assartuineq pillugu isumalioqatigiissitap aamma inassutigaa Ilulissani mittarfik tallineqassasoq 1.099 meterimut erseqqissaatigaali ukiut amerlanngitsut qaangiunneranni tallineqartariaqalersinnaasoq. Avannarpasinnerusummullu assartuineq eqqarsaatigalugu inassutigineqarpoq Qaanaap mittarfia matuneqassasoq siornatigutullu Pituffik aqqusaarlugu silaannakkut angallanneq ingerlanneqalissasoq.
Tunumi angallanneq eqqarsaatigalugu assartuineq pillugu isumalioqatigiissitap inassutigaa Kulusumi mittarfik matullugu Tasiilami mittarfiliortoqassasoq. Tamanna inassutigineqarpoq tunumi inuussutissarsiornerup sukkanerusumik ineriartornissaanut tamanna aqqutissaasorineqarmat.
