Asilipé aallartilerpoq
Aallakaatitsivik nutaarluinnaq piareerluinnareerpoq, tassa aallakaatitassiap Asilipe-p aallakaatitsivissaa.
Aallakaatitassiamilu Malik Kleist aaqqissueqataassaaq.
- Quujasaarusianik isiginnaagassiaqassaaq, taavalu ilanngutassiat assigiinngitsut quujasaarusiat.
Taavalu pulaartoqartarumaarpugut, pulaartut oqaloqatigalugit eqqisisimasumik quujanaasattumik, Malik Kleist taama oqarpoq.
Asilipemi saqqummiisartuussapput JJ Lennert-Sandgreen aamma Hans Jukku Noahsen.
Aallakaatitsinerlu aamma unammisitsinertaqartassaaq.
- Pinnguartitsisarlutalu taavalu isiginnaartunut unammisitsisassaagut aningaasanillu eqqugassaqartarluni. Unammeriaatsillu marluussapput, SMS-ikkut peqataalluni taavalu unammeriaaseq alla paggatitsilluni illoqarfimmi aatsaat aallakaatitassiaq aallartereeraangat eqqaaneqartartussaq sumiinnersoq, JJ Lennert-Sandgreen oqarpoq.
Ateq Asilipe
Aallakaatitassiap atissaanik eqqarsarnermi Hans Jukkup 1980-kkuni kaammalaatertik, maannali toqoreersoq, Kristian Abelsen, Asilipe, eqqaavaa.
- Sooq pinerpoq taanna puttallariasaarami, taava oqarama: "Asilipe". Taava Malik Kleist aperigami "Asilipe? Asilipe?". Torragigamiuk assut, taava aamma uteqattaalerlugu Asilipe atissaqitsittorujussuanngoratsigu. Taava nalunngisakka Asilipe-mik ilisarisimannittut apersorpakka qanoq igineraat aallakaatitaq taamak atsissagutsigu, oqarput:
"Inuttaata nuannarisimassagaluarpaa uumagaluaruni." Eqqaaneqarnera ataqqinartuuli, Asilipe, Hans Jukku Noahsen oqarpoq
JJ aamma Hans Jukku decemberip qeqqata missaata tungaanut Asilipe-mi saqqummeeqatigiittassapput. JJ-illu suleqatigiinnissartik erinigilereerpaa.
- Hans Jukku illarnarpallaannginnami, taava uanga illarnariarama immaqa taanna Hans Jukkup iluaqutigilaartarpaa, soorlu illarnarniarnera akuerinarnerulerluni, JJ oqarpoq.
Asilipe tallimanngornikkut nalunaaqutaq arfineq-pingasunut toqqaannartumik aallakaatinneqassaaq, nalunaaquttallu akunnera ataaseq aallakaatinneqartassalluni.
