Asiip ukiortaami oqalugiaataa
- Ataatsimut isigalugu 2014 maqaasinavianngilara, Kommuneqarfik Sermersuumi borgmesterip Asii Chemnitz Narupip ukiortaami oqalugiaatini taama aallarnerpaa.
Ukioq qaangiuttoq ilungersunarsimanerarpaa, Nunatta aningaasaqarnera malunnaatilimmik ajorseriarsimalluni suliffissaaleqisullu aamma amerleriarsimallutik. Nunatta nunanit allanit isigineqarnera aamma innarlersimanerarpaa aammalu kalaallit akunnerminni ukiumi qaangiuttumi avissaartuussimanerarlugit.
Suleqatigiittoqarnissaa neriuutigaa
Inatsisartunulli qineqqusaarnermi suleqatigiinnissap siammasissumillu isumaqatigiissuteqartarnissap annertuumik oqallisigineqarnerat borgmesterip nuannaarutigaa.
- Qinersinerup kingorna tamatuma puigorneqarsimannginnissaa neriuutigeqaara, borgmesteri oqarpoq.
Piumasaqaatit naleqqutinngitsut
Kommuneqarfimmi inunnik isumaginnermut aningaasartuutit ukiumi qaangiuttumi amerliartorsimanerat erseqqissaatigaa, tamatumunngalu atatillugu nalimmassaanissamut piumasaqaatit naleqqutinnginnerarlugit.
Kommuneqarfimmi aningaasaqarnermik aqutsinermut tunngatillugu aaqqinniagassat annertusimapput, Asii Chemnitz Narupilli kommuneqarfiup qaammatini qulingiluani sukannersumik nakkutigineqarnerata qaangiunnera nuannaarutiginerarpaa.
ASIIP UKIORTAAMI OQALUGIARNERA UANI TAKUUK
Tamannali pingaarnersiunernik ilungersunartunik pisariaqartitsisimavoq, ilaatigut soraarsitsiortortoqartariaqarsimalluni, borgmesterilu naapertorlugu kommuneqarfimmi innuttaasut kiffartuussinerup ajorseriarnissaa naatsorsuutigisariaqarpaat.
Kiisalu borgmesterip erseqqissaatigaa kommuneqarfimmi allat atugarliuutaannik atueqataajumanngitsutut pisuutinneqartarnera naammagilerlugu.
- Kommuneqarfipput Nunatsinni naligiinnerulernissamut tunissuteqarnerpaasarpoq. Millionerpassuit Nuummit Sermersuumiillu nunap sinneranut tunniunneqartarput, Chemnitz Narup oqarpoq.
Takornariaqarneq, rubinit nunarsuullu sinneranut isigineq
Borgmesterilli rubinisiorfittaassaq nuannaarutigaa, kommunillu Naalakkersuisut iliuuseqarnissaat utaqqiinnarnagu nammineq siuariartornermik pilersitsinissaa naqissuserlugu.
Tamatumanilu borgmesterip takornariartitsineq immikkut isiginiarpaa aammalu suliffeqarfinnik aallarnisaasunut aalisartunullu atugassarititaasut nalinginnaasumik pitsanngorsarneqarnissaat tikkuarlugu.
Kiisalu borgmesterip Nuup nunatsinni illoqarfiit pingaarnersarigaat naqissuserpaa, illoqarfimmilu kulturit assigiinngisitaartut nunarsuullu sinneranut isigisoqarnera nuannaarutissaasut oqaatigalugu.