Asii: Suliagut tamakkiisumik aaqqiivigisimanngilagut
Suliat 520-t sulisut pingasut suliassaraat, nalunaarutiginninnerit iliuuseqarfigineqartanngillat, suliallu suli naammassineqaratik matuneqartarnerat nalunaarusiami allaaserineqarpoq.
Borgmester Asii Chemnitz Narupip nassuerutigaa kommunip suliassani naammaginartumik naammassisimanngikkaa.
- Soorunami eqqarsarnartorujussuuvoq kommunerujussuanngorattali isumaginninnikkut sulinerup sorpassuartigut nukittorsarniarlugu iliuuseqareeraluarpugut, aningaasaliissutillu amerlillugit, taamaattorli ajornartorsiut una annertooq tamakkiisumik aaqqiiffigisimanatigu matumani erserpoq, nakkutilliinermi nalunaarusiap ilaatigut Tasiilami meeqqat inuusuttullu pillugit isumaginninnikkut suliat 520-jusut takutinnerata kingorna Kommuneqarfik Sermersuumi borgmesteri, Asii Chemnitz Narup nassuerpoq.
Aamma atuaruk Tasiilami isumaginninnermi suliat 520-it
Nalunaarusiami kisitsisit maannakkorpiaq kisitsisaaneri borgmesterip erseqqissarpaa, taamaakkaluartorli akueriinnarneqarsinnaannginneri naqissuserpaa.
- Soorunami taakkununnga suliassat uagut tungitsinninngaanniit misissoqqissaaqqinneqartariaqassapput, aamma oqareernittuut sulisoqarnikkut pissutsit nukittorsarniarsimagaluarpagut, tamakkiisumik iluatsitsisimanngilagut, tassuunakkut suliniarnerput nutaamik eqqarsarluta ilusilertariaqarparput. Taamaattumik, naamik ukua kisitsit taama amerlatigisut akuersaaginnarnavianngilagut, Asii Chemnitz Narup KNR-imut oqarpoq.
Taamaattumik Asii Chemnitz Narupip issiaannartoqarsinnaannginnera iliuuseqartoqartariaqartorlu ilisimaarilluarpaa.
- Nalunaarusiaq tigoqqammerparput, politikkikkut nalilersuinerit aallartilerput, taamaattumik massakkoqqissaaq oqarsinnaanngilanga suliniutit tigussaasut uku uku siunniuppagut, Asii Chemnitz Narup oqarpoq.
Kommunalbestyrelsemi oqaloqatigiinnerit ullumikkorpiaq aallartittut taanna nangilluni nassuiaavoq
- Neriorsuutigisinnaasara unaavoq, nalunaarusiaq aqqutigalugu paasissutissat apuunneqartut pimooruteqqissaarlugit nalilersuilluta pitsanngorsaasinnaanissamut aqqutissat suulluunniit ujartussavagut iliuusissanillu aalajangersaalluta ukioq manna, ukiariartornerani, Kommuneqarfik Sermersuumi borgmesteri Asii Chemnitz Narup oqarpoq.