Asii Chemnitz Narupip Sermersooq ammanerutikkusuppaa

Innuttaasut kommunimut attaveqarnerata sapernannginnerulernissaanut, sulisullu suliatik pillugit oqaaseqarsinnaalernissaannut politikkip nutaap sunniuteqarnissaa neriuutaavoq.

- Tusagassiorfiit innuttaasullu ilaatigut kipiluttunartorsiortutut oqaatigisarpaatigut. Taanna pitsaasuunngimmat immikkut aalajangersaavugut, Asii Chemnitz Narup oqarpoq.

Sulisut oqaaseqarsinnaalissapput

Kommunip attaveqarnissamut pilersaarutaa nutaaq allannguingaatsiassaaq.

Aqutsinermut tunngasunik paasisaqarniaraanni kommunimi pisortat akisussaasut kisimiillutik siornatigut oqaaseqarsinnaapput.

Allannguinerulli kingorna sulisut tamarmik oqaaseqarusukkunik oqaaseqarsinnaatitaalissapput.

- Sulisoq kinaluunniit suliani pillugit oqaaseqarsinnaanngussaaq, imaanngikkaluartoq pinngitsaalillugu pisussaaffileripput, kisianni periarfissaq taanna ammartussanngorpoq, Asii Chemnitz Narup oqarpoq.

Kommuni Facebookkimi

Ammaneruniarnermik politikkimik aallarniinermi Kommuneqarfik Sermersuup facebookkimi quppernermik pilersitsinissaa kommunalbestyrelsip ilaatigut aamma aalajangerpaa.

Facebookkikkut quppernermi kommuni nutaarsiassaqartitsisassaaq, kommunillu ammasarfiata avataatigut innuttaasut quppernikkut aamma saaffiginnittarsinnaasassapput.

- Inuit sukkasuumik, namminnerlu piffissaqarnertik najoqqutaralugu, saaffiginnissinnaanissaat taamaasilluta ammaakkusukkatsigu, Asii Chemnitz Narup oqarpoq.

Ammanerorusuppoq

Borgmesterip ilanngullugu aamma oqaatigaa, Kommuneqarfik Sermersuup ammanerulernissani suli sullissutigigaa.

- Innuttaasut malinnaaqqullugit inussiarnersumik qinnuigissavakka, ippigisaqarunillu apuutilaartaqqullugit. Taamatut sukkut pikkorinnerulernissarput paasinerusinnaassagatsigu, Asii Chemnitz Narup oqarpoq.