Asii Chemnitz Narupip inissaaleqineq akiornialerpaa

Inissialiornissanut pilersaarutit pillugit, Nuummi innuttaasut Katuami ualeq manna paasissutissinneqarput, tassani ilaatigut paasissutissiissutigineqarlutik, ukiut tallimat ingerlaneranni inissianik 800-nik sanaartortoqarnissaanik pilersaarutinik.

- Pitsaasunik inissialiorusuppugut. Taamaammat inissiat 800-it ukiut pingasut ingerlaneranni napparneqartussasut siunniuppagut. Inissiallu 84-it Tuujummi aasaru sanaartorneqarneri aallarteriissallutik, borgmester Asii Chemnitz Narup oqarpoq.

Inissianik taama amerlatigisunik sanaartornissamut pilersaarutit Nuummi innuttaasunut qujanartussaassagunarput, tassami maannakkorpiaq inissiani initaarnissamut Nuummiinnaq  Iserit A/S-imut 1400-t utaqqisutut allattorsimaffimmiipput.

- Nuup illoqarfiani inissianik amigaateqarneq ukiorpassuarni maanna atuutereerpoq. Tamannalu pillugu kommunimut 2013-mi qinersereernermi aalajangerpugut ukiut tallimat arfineq marlullu ingerlaneranni inissianik 800-nik sanaartortitsiniarluta, Asii Chemnitz Narup oqarpoq.

Taama amerlatigisunik inissialiornissamut kommunip aningaasaatai naammaqqajanngillat. Taamaattumik kommunalbestyrelse immikkut qanoq iliuuseqarpoq.

- Tassalu realkreditinstituttit arlariit Københavnimi februaarip qaammataani oqaloqatigaagut taamatullu Aningaasaqarnermut Naalakkersuisoq januaarimi ataatsimeeqatigaara, taamatullu Ineqarnermut Naalakkersuisoq februaarimi ataatsimeeqatigalugu ilisimatillugit taarsigassarsiniartariaqarnitsinnik. Tamannalu ajunngivissumik tiguneqarpoq nuannaarutigisatsinnik, Asii Chemnitz Narup oqarpoq.

Inissianilli attartornissaq kisiat isumalluutigineqanngilaq. Nuummi innuttaasut ilaasa namminneq illutaarnissaat aamma periarfissaalissasoq, borgmester Asii Chemnitz Narup oqarpoq.

- 20-20-60-mik aaqqissuussinermik taaneqartartoq aqqutigalugu kommunillu akileeqataaffigisassaanik, 17,5 millioner koruuninik ukioq mannamut aamma ukiunut pingasut tulliuttunut immikkoortitsinikuuvugut. Innuttaasullu manninerisaminnik illuliornissaannik taamatut periarfissiineq pilerineqarluartoq takusinnaavarput, tamannalu qujanarpoq iluaqutaanissaalu qularinatigu.

Kommuneqarfik Sermersuup borgmesteria, Asii Chemnitz Narup taama oqarpoq.

Taassuma ilanngullugu oqaatigaa, inissaaleqinerujussuup pilersitaanik innuttaasut inuuniarnermikkut ajornartorsiulersarneri inissianik  amerlanernik sanaartornikkut ilaatigut qaangerniarneqarnissaa ajornannginnerulersinnaassasoq neriuutigineqarmat.