Assi: Kommuneqarfik Sermersooq

Asii: Allanngorfissaq tikipparput

Kommuneqarfik Sermersuumi borgmesteri, Asii Chemnitz Narup (IA), Nunatsinni kommunimut qinersinissaq pillugu Danmarkimi ullumikkut oqallissaaruteqarpoq.

Tamanna danskit aviisianni Jyllands-Postenimi allaatigisaqarneratigut pivoq.

Sermersuup illoqarfiit pingaarnersaannut periusissiaa Nuummilu siunissami 30.000-inik innuttaasoqalersimanissaa, mittarfissuartaarnissaa issittumilu illoqarfissuartut qitiusumik inissisimalernissaa Asii Chemnitz Narupip allaatigisamini oqaluttuaraa.

Nunatsinniilli nunanut allanut nussortoqarnera, aningaasatigut isumaginninnikkullu ajornartorsiutit sinerissamiillu Nuummut nutsertoqarnera aamma eqqaavai.

Tamannalu ilaatigut Danmarkip Nunattalu akornanni nunasiaataanerup oqaluttuarisaarneranut tunngatillugu isiginiagassaavoq.

Taamatummi inissisimasoqalernera Nunatta iliuuseqarfigisariaqalerpaa, Sermersuumi borgmesteri taama allappoq.

- Siumut tikkuussisunik, innuttaasunik periarfissiisunik Nunattalu siunissaata pitsaasuunissaanik upperinnilersitsisussanik, immaqalu aamma allamiut aningaasalersuerusulernerannik suliartorusunnerannillu angusaqarniassaagut? Imaluunniit inuit imminnut ilaquttaminnullu siunissaqarsorinatik Nunatsinnit qimarrannerisa nalaani unikkaluttuinnassaagut? Arlaat toqqagassaavoq.

Taamatut inissisimasoqarnera Asii Chemnitz Narupip allanngortinneqartariaqarsoraa.

- Innuttaasut nunatsinniitiinnarnissaannik, inuusuttut ilinniarluarsimasut angerlartinnissaannik - kiisalu Nunatta sulisunut pikkorissunut piginnaasalinnullu, minnerunngitsumillu avataanit aningaasalersuiffiginissaanut soqutiginarsarnissaa pisariaqarpoq.

Taamatullu ineriartortitsinermi Danmarkimi pingaaruteqarnerusumik inissisimasariaqarpoq, Sermersuup borgmesteria taama isumaqarpoq.

- Naalagaaffeqatigiinnerup siunissami attatiinnarneqarnissaa Danmarkip kissaatigippagu - aamma ullumikkut pissutsinut naleqqiullugu allaanerusunik atugassaqartitsiffiussagaluarpalluunniit - taava Nunatta Danmarkimit siunissami pitsaanerusumik oqaloqatigineqartalernissaa pisariaqarpoq.

 

Isummersuutit