Kangiamiut nuna minguitsoq attorneqanngitsorlu ujartorpaat

Immikkut ilisimasalik taama isumaqarpoq, erseqqissarlugulu Kangiamiut piumaqisaannik tunniussassaqartugut.

- Isumaga malillugu paasitittariaqarpavut aallarteqqammisuulluta. Taakku paasinnittaasaat malillugu manna suli tikinneqarsimanngittuuvoq, nunaavoq nutaaq suli attorneqarsimanngitsoq, norgemiu Geir Helgesen Københavnip ilisimatusarfiani kangia pillugu immikkoortortami NIAS-imi pisortaq taama oqarpoq.

Aamma atuaruk Takornariat nunatsinnut tikittut ukiormanna amerlapput

Takornariaqarnermut siunnersuisoqatigiinni timmisartortitseqatigiiffinnilu tuniniaaviit pingaarnerit tassaapput USA, Tuluit Nunaat Tysklandilu. Kangiatali siunissami eqiingaffigineqarnerulernissaa, Air Greenlandimi tuniniaanermut pisortaq Anika Krogh oqarpoq, erseqqissarlugulu niuverneq aalaakkaanerusartoq piseqqusaarfiit siammaatiteraanni.

- Visit Greenland suleqatigalugu Kangiani tuniniaavissamik toqqaassaagut, ilimanarpoq kineserisut oqaluffiusumik toqqaanissarput. Taama iliornikkut siammaassaagut, Anika Krogh oqarpoq.

Kineserit niuverfiginerisigut Kalaallit Nunaata periarfissaqarluarnissaa Geir Helgesenip ilimagaa. Erseqqissarpaali ilisimaqqaartariaqarmat takornariaqarneq qanoq ittoq piumanerlugu, aarlerisaarutigalugulu takornariarpassuarnik tikisitsisarnissaq toqqartariaqanngitsoq kangiamiut pisuut pissarsiariniaraanni.

Aamma atuaruk Islandip Nunarput suleqatigiumagaa

Kinami Koreamilu ullutsinni inuuniarneq qaffassimaqaaq, naallu illoqarfissuarni ajornannginnerulersimagaluartoq, suli amigaateqartoqarpoq.

- Inuunermili naleqartitaqarneq suli ajornartorsiutaaqaaq, tamannalu Kalaallit Nunaanni eqqaamiunilu nunani avannarlerni killerni neqeroorutigineqarsinnaavoq.

Geir Helgesen naapertorlugu kineserinut koreamiunullu neqeroorutigisinnaasagut tassaapput nunap eqqissinarnera, silaannarinnera, nuna isorartooq isikkivilillu allaallu uumasut nujuartat.

- Aatsaat taama pisoqassaaq inuit tikillugit oqaloqatiginerisigut attaveqaatinillu pilersitanik aallussinikkut, inuillu qaaqqullugit neqeroorutit piginnaasallu takutillugit. Taama iliornissaq assut pingaaruteqartoq, Geir Helgesen oqarpoq.

Aamma atuaruk Hotel Arctic aatsaat taama angusarissaartigisoq