Arsaattartut persuttaasut unammeqataasinnaajunnaarallarput
Angutit arsaallutik Ilulissani pissartanngorniunnerat siorna nuanniitsumik naggaserneqarpoq naggataarnersioreernermi nangikkiartuni arsaattartut pingasut unataammata. Unatarneqartut ilaat napparsimmavimmi mersorneqartariaqarsimavoq.
Maanna GBU'p siulersuisui aalajangerput arsaattartut taakku pingasut ukiormanna aggustip 31-ata tungaanut unammeqataasinnaajunnaassasut. Taamaasillutik ukiormanna pissartanngorniunnerni tamani peqataasinnaajunnaarput.
- Erseqqissarusuppara eqqartuussisutut pissusilersornissaq uani siunertaanngimmat. Kisianni GBUp malittarisassai malippagut. Tassanilu allassimavoq klubbip imaluunniit kattuffiup isiginerlunneqaatigisaanik iliortut unammeqataasinnaajunnaarsinneqarsinnaasut, GBUp siulittaasua Lars Lundblad KNR.gl-mut oqarpoq.
Aalajangerneq pivoq februaarip 21-at kinguninnguali naammagittaalliutigineqaraluarluni. Taanna GBUp ileqqorissaarnissamut ataatsimiititaliaani suliarineqarpoq siulersuisullu aalajangernerat naqissuserneqarluni.
Persuttaaneq siorna aggustimi pivoq taamalu piffissaq sivisooq ingerlareersoq aatsaat aalajangertoqarluni
- Paasissutissanik sukumiisunik katersuiniaqqaarsimavugut toqqammavissaqarluarluta aalajangersinnaajumalluta, Lars Lundblad oqarpoq.
- Aamma FIFA-mik DBU-millu suleqateqarpugut tassanilu pisussaaffeqarpugut pissutsinik tamakkunikka akuersaannginnermik takutitsinissamut. Maanna pissartanngorniuttoqalerpoq aalajangernerlu piffissaq eqqorlugu pivoq, Lars Lundblad oqarpoq.
