Arsaattartut Islandimi unammipput
Angutit arsaattartut 1. divisionimeersunut Grotta-mut 3-3-mik naligiiginnarput. Tassani kalaallit takutitsilluarput islandimiullu nukittussutsimikkut nallersuuffigisinnaalluarlugit. Kalaallit arnartaat unamminerminni 2. divisionimeersunut 0-3-mik ajorsarput.
Markus Jensen kalaallini siulliulluni ungasianiit isertitsivoq. Thomas Abelsen 2-0-mut isertitsivoq teqeqquaniit aallartitsisoqarnerata kingorna. Kalaallit isertitaasa pingajuat Norsaq Lund Mathæussenimit isertinneqarpoq suleqatigiilluarnikkut periarfissaq kalaallit pissarsiarimmassuk.
- Arsartut assut kakkanaarpakka eqqarsaatigigaanni ukiut marluk kingulliit nunanut allanut unammisimanngitsut, nuna tamakkerlugu angutini sungiusaasoq Tønnes O.K. Berthelsen KNRimut taama oqarpoq.
Taanna aamma oqaluttuarpoq unamminerup ingerlanerani tunniussinerliornerit ikittuararsuusimasut aammalu timimikkut islandimiut nukittugaluaqisut kalaallit nallersuuffigisinnaalluarsimagaat.
- Arsatugut assut teknikkigissaarput, aamma 3-1-mik siuaraluarpugut, Tønnes O.K. Berthelsen oqarpoq.
Muminnerulli kingorna kalaallit taarseraangaatsiarput islandimiullu angumallutik isertitaat kalaallit paatsooqatigiinnerisigut pipput. Kalaallit angutit sungiusaammik unammeqqissapput pingasunngorneq juunip 22-at Throttur 1. divisionimi, tassa pikkorinerit tulliini, unammisartut unammissallugit.
Arnat
Kalaallit arnartaasa sungiusaammik unammivaat IR 2. divisionimi unammisartut tassanilu 3-0-mik ajorsarput muminnermi 0-0-mik naligiiginnarsimagaluarlutik.
- Unamminerup ingerlanerani quleriarluta taarsiivugut unammisavullu isertitsipput paatsooqatigiinnitsinni. Arsap annaanerani isumaqatigiissutitta nalorninannginnerunissaat pisariaqarpoq, nuna tamakkerlugu arnanut sungiusaasoq Bent Petersen KNRimut taama oqarpoq.
Arnat sungiusaammik unammeqqissapput inuiattut ullorsiornitsinni Aldernes 2. divisionimeersoq unammissallugu.
