Arsaannermik ilinniarfik qulakkeerneqarpoq
Meeqqat arsaannermik ilinniarfiat, GBU-p aaqqissuuttagaa, maanna ukiuni arfineq marlunni ingerlanneqartareerpoq ukiullu tamarluinnaasa pisarluni. Meeqqat tallimaniit 15-init tikillugit ukiullit arsaannermi ilinniarfimmi peqataatinneqartarput, meeqqanillu nuannarineqaqaluni.
- Aningaasaliiffigineqarnerput nuanaarutigaarput, Kalaallit Nunaanni Arsaattartut Kattuffianni pisortaq, GBU-mi meeqqat arsaannermut ilinniarfianni ataqatigiissaarisoq, Jens Tang Olesen oqarpoq.
Meeqqat arsaannermut ilinniarfiat ukioq manna aaqqissuunneqarpat naatsorsuutigineqarpoq meeqqat 2.000-it pallillugit amerlassuseqartut peqataajumaartut.
- Arsaanneq Kalaallit Nunaanni nuannarineqartorujussuuvoq, naak arsaattarfiit amerlanersaat pitsaalluinnartutut isigineqarsinnaanngikkaluartut, meeqqat nuannisartaqaat, Jens Tang Olesen oqarpoq.
Kalaallit Nunaanni Brugsenit aningaasaliinerisa, meeqqat arsaannermut ilinniarfiat tulleq akikinnerusumik ingerlanneqarsinnaanngorpoq.
- Meeqqat peqataasut tamarmik tujuuluaqqamik arsamillu tunineqassapput, aamma naatsorsuutigaarput meeqqat nuannisarnermik pissarsiumaartut, Jens Tang Olesen oqarpoq nangillunilu oqaatigalugu, meeqqat arsaattussat tamarmik inersimasunik pikkorissunik sungiusaasoqassasut.
