Kommuninut qinersineq 2017 Arnat sassartut ikinnerupput

Kommuninut qinigassanngortittut sisamaagaangata, ataaseq arnaasarpoq.

Arnat namminneq najukkaminni politikkimik soqutigisallit amerlagisassaanngillat. Nunami tamakkerlugu kommuninut qinigassanngortittuni 26 procentii arnaasut, KNR-ip misissuinerata takutippaa.

Kommuninut qinigassanngortittut sisamaagaangata, ataaseq arnaasarpoq. Arnalli qinigassanngortittut amerlassusaat kommunini assigiinngitsuni assigiinngiiaarput.

Qaasuitsup Kommuniani avinneqartussaasumi qinigassanngortittut misissuataaraanni, taavani arnat qinigassanngortittut ikinnerpaapput. Kommunimi avannarlinngortussami, tassa illoqarfiit Qaanaamiit Ilulissat tungaanut qinigassanngortittuni 16 procentii arnaapput. Tassa sassartut arfiniliugaangata ataaseq arnaasarluni.

Titartakkap kommunini qinigassanngortitut suiaassusaat takutippaa. Qinigassanngortittut allattorsimaffii kommunit nittartagaanniittut tunngavigalugit kisitsivugut.

 

Qaasuitsup Kommuniani sassartut ilagaat Tasiusameersoq Regine N. Bidstrup. Arnat politikkimik suliaqarnermi akulerunnissamut amerlavallaat tunuarsimaartut, taanna isumaqarpoq.

- Soorlu uagut aalisartoqarfimmiuuvugut arnarpassuillu sulisartuupput, ilaatigut suli malunnartarluni anaanaanerusut meeqqaminnik akisussaasuunerusartut. Soorlu assersuutigalugu soraaraangamik angerlarsimaffimminni suliassanut meeqqatillu isumaginissaannut piffissap sinnera atorniartarpaat, Inuit Ataqatigiit tunuliaqutaralugu sassartoq, Regine N. Bidstrup, oqarpoq.

Regine N. Bidstrup Tasiusap atuarfiani ilinniartitsisuuvoq.

 

Regine N. Bidstrup nunaqarfimmik aqutsisuni ukiuni arlaqartuni ilaasortaavoq. Arnat piginnaasaqarluarmata, amerlanerusut kommunalpolitikkimi peqataanissaat kissaatigaa, namminerlu arnaalluni akuuninermini ajornartorsiuteqarsimannginnini eqqaallugu. 

- Uanga politikkimik suliaqarninni arnatut aporfeqanngilanga. Suleqatigiilluartarpugut, arnaaneq apeqqutaatinnagu isummagut naapeqatigiittarput.

Titartakkap partiinit sassartut suiaassusaat takutippaa. Qinigassanngortittut allattorsimaffii kommunit nittartagaanniittut tunngavigalugit kisitsivugut.

 

Kujavarteraanni qinigassanngortittuni arnat amerliartuaarput, Kommuneqarfik Sermersoorlu arnanik amerlanerpaanik qinigassanngortitaqarfiulluni. Kommunimi tassani sassartut pingajorarterutaat qaangilaarlugu arnaapput.

Partiini ataasiakkaani arnat sassartut amerlassusaat aamma nikingassuteqangaatsiarput. Partii Naleraq arnanik sassartukinnerpaalluni, sassartitaasa 15 procentii arnaapput. Demokraatillu qinigassanngortitaani arnat angutinit amerlanerupput, tassa Demokraatit tunuliaqutaralugit qinigassanngortittuni 63 procentii arnaammata.

Tamanna pillugu unnugu Qanoruumi paasisaqarnerusinnaavutit.

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!