Arnat qineqqusaartut amerliallapput
Folketingimi inissat 179-iupput, taakkulu 808-t 2007-imi pilernguppaat, qinigassanngortittut maanna 804-nut ikileriarsimallutik. Altingip nittartagaani taama allaaserinnipput.
Kisitsisit Danmarkimi Naatsorsueqqissaartarfimmeerput, qinigassanngortinnissamut ulloq killissarititaq sapaatiummat pereersorlu qinigassanngortittut qassiunersut naatsorsuereerlutillu.
Qinigassanngortittut taama ikitsiginerannut pissutaavoq qinigaaffiit 2007-imi januaarip ulluisa aallaqqaataanni aaqqissuuteqqinneqarmata, qinigassanngortitsiviit 103-niit 92-inut ikilisinneqarlutik.
Qinigassanngortittut ikiliartoraluartut, arnat qinigassanngortittartut amerliartorput. Septembarip ulluisa 15-ianni qinersinissami arnat aqqi 267-iussapput, tassa 33,2 procentit. 2007-imi 32,2 procentiupput, 2005-imi 31,6 procentiullutik.
Naligiissitaaneq eqqarsaatigalugu Nunatsinni siuarsimaneruvugut. Arnat Nunatsinni qinigassanngortittut 50 procenterpiaapput. Qinigassanngortittunit 16-init affaat, tassa arfineq-pingasut arnaapput.
Inuit Ataqatigiinnit qinigassanngortittunit sisamanit arnat pingasut qinigassanngortipput, Demokraatit Siumullu tamarmik marlunnik arnartaqarlutik tulliupput, Atassullu arnamik ataatsimik qinigassanngortitsilluni.
