Ilisimatooq Arnat politikkimi amerlanerulissappata meeqqeriviit amerlillik
Qineqqusaartut sisamararterutaannai arnaasut, KNR-ip kisitsisereerluni pingasunngormat oqaatigisinnaavaa.
Avannaanili kommunimi avinneqartussami arnat sassartut ikinnerpaapput. Avannarpasinnermi Ilulissaniit Qaanaamut illoqarfittalimmi qinigassanngortittut 16 procentiinnaat arnapput, tassa qinigassanngortittut arfiniliugaangata arferngat arnaasarpoq.
Taamaanneralu suiaassuseq naligiinnerlu pillugit ilisimatuup Mariekathrine Poppel ilisarnatuutippaa:
- Piniartoqarfinni arnat sassartartut amerlanngillat, arnalli illoqarfinni angisuuni sassarnerusarlutik, Ilisimatooq taama oqarpoq. Arnat politikkimut akuuneruleqqullugit politikerit ikiuuttariaqartut, taassuma tikkuarpaa.
- Taakkunanilu arnat amerlasuut aamma anaanaapput kisimiittut, piffissaqassagunik aporfeqarpallaaratik politikkimut akuussagunik meeqqeriviit amerlanerusut taavalu immaqa aamma soorlu erninermi sulinngiffeqarnerit sivisunerusut taamaattut aporfiujunnaartinneqartariaqaraluarput, Mariekathrine Poppel taama oqarpoq.
Partiini ataasiakkaani arnat sassartut amerlassusaat aamma nikingassuteqangaatsiarput. Partii Naleraq arnanik sassartukinnerpaalluni, sassartitaasa 15 procentii arnaapput. Demokraatillu qinigassanngortitaanni arnat angutinit amerlanerupput, tassa Demokraatit tunuliaqutaralugit qinigassanngortittuni 63 procentii arnaammata.
Naligiinneq pillugu immikkut ilisimasallip aamma oqaatigaa arnat angutillu suiaassusertik aallaavigalugu sulianik akisussaaffinillu qinersisartut. Arnalli amerlanerujartortut politikkimik suliaqartuusut erseqqissarpaa.
- Aamma eqqaamassavarput arnat qinersisinnaanngornikuupput aatsaat 1948-mi taamanikkorniilli ilaa amerliartuaarsimapput ullumikkut allaat 33 procentiisa missaat qinigaasarlutik, Mariekathrine Poppel Qanoruumut taama oqarpoq.
