Arnat assammik arsartartut Puerto Ricomi unammigiarput
Amerikap nunavittaani assammik arsarluni unammersuarnissamut anngunniunnerit Puerto Ricomi ataasinngorpat aallartissapput, arnallu nunanut allanut unammisartut Nunatsinneersut peqataassapput, kalaallillu arnartaat USA-mut ataasinngorpat unammissallutik.
Nunanut allanut unammisartut Puerto Ricop illoqarfiisa pingaarnersaannut San Juanimut apuulluareerput, pingasunngornerup ullaassakkut apuullutik. Puerto Ricomiut OL-imut peqataatittagaasa sungiusariartarfianni inissinneqarsimapput, inigisaalu pitsaalluinnartut oqaluttuarineqarpoq.
Arnat assammik arsarlutik nunanut allanut unammisartut maanna sungiusaleruttorput, Amerikap nunavittaani assammik arsarluni unammersuarnissamut anngunniunnerni peqataanissartik piareersaleruttorlugu.
Puerto Ricomut unnugu unammissapput, sungiusaatigalugu unnugu nalunaaqutaq arfinermut unammissallutik.
Unammersuarnerit ataasinngorpat marsip ulluisa 30-anni aallartissapput, sapaatiuppallu tulliani apriilip tallimaata tungaanut ingerlassallutik.
Cuba, nunallu pitsaanerpaat sisamat allat Amerikap nunavittaani assammik arsarluni pissartanngorniutivinnissaannut anngussapput, tassami Cubami Havanami ukioq manna maajip ulluisa 21-annit maajip ulluisa 28-ata tungaanut pissartanngorniutivittoqartussaavoq.
Kalaallit Nunaata anngunniunnerni unammisassai tassaapput USA, ataasinngorpat unammineqartussat, marlunngorpallu unammisassat tassaallutik Mexico, Puerto Ricolu pingasunngorpat unammineqassallutik, Martiniquelu sisamanngorpat unammineqassalluni. Taamaalereerpat Cuba tallimanngorpat unammineqarumaarpoq.
