Arnaq silami apummi sinittoq siumorneqartoq

Sila isseqaaq - taamaammat immissinnut paaralusi - Nuummi politiit taama mianersoqqusillutik facebookiminni allaaserisaqarput.

Allattoq Bikki P. Kleist

decembarip 01-at 2016 06:34

Juulleriartornerani sila issitsillugu mianersorfissaqartoq politiit nalunaarutigivaat.

Kalaallit Nunatsinni sapaatit akunneri kingulliit ingerlanerini 20-t sinnerlugit isseqattaarpoq. Silalu taamaatsillugu aalakuungaatsiaraannilu silami angalaarneq ajoraluartumik imminut navianartorsiortinnerusinnaavoq.

- Nuummi tamanna ukioq manna arlaleriarluta misigereerparput, aalakoorujussuarsimaneq silamilu artulersimaneq peqqutaalluni toqquteqartoqarmat.

Aamma atuaruk Angut nillorsimasoq nassaarineqartoq

Arnaq silami apummi sinittoq angummit inuusuttumit siumorneqarsimasoq pillugu politiinut pingasunngornerup unnuaani kalerrriutigineqarpoq.

Qujanartumilli arnaq sivisuumik apummi nalasimanngilaq, politiillu arnaq itersarsimavaat angerlaassimallugulu.

Eqqaamallugu illit ilaqutatillu matumani pineqarmata:

-Aniissamaaruit pisuttuassamaaruilluunniit snapsip nungutaava imaluunniit immiaaqqat kingulliit tallimat pinngikkallarlugit pitsaaneruvoq. Perusunngilarpummi illerpiaq apummi nalasutit nassaarineqarnissat.

Taamaattumik immissinnut immitsinnullu paarisa, Nuummi politiit facebookiminni taama kaammattuuteqarput.