Arnaq inuusuttoq tuttup kumaanik tunillanneqartoq
Tuttup kumaa, Hypoderma tarandi, uumaannassaguni uumasumut allamut millugusimasariaqarpoq, piffissamilu juulimit septembarimut uumasup millugusimaffigisami amiani manniliortarluni.
Uumasullu millugusimasarfii Nunatsinni tassaanerupput tuttut umimmaallu. Arnarlu 25-nik ukioqartoq Nunatsinni taamatut millugusimaffigineqarluni manniliorfigineqartuni nalaanneqartut siullersaraat. Tamannalu arajutsisassaanngilluinnartoq, nakorsanut atuagassiami allaaserineqarpoq.
Tuttup kumaasa quperlussai tigumiartup amianut pulasarput, tigumiartullu qitiata isaasalu tungaannut ingerlaalersarlutik.
Qujanartumilli arnap 25-nik ukiullip tamanna anigorpaa ajoquseranilu.
Tuttulli kumaanik quperlorsimasut nakorsarneqanngikkaangata tigumiartup isaanut annguttarput, tamannalu tappingernermik kinguneqarsinnaasoq, nakorsanut atuagassiami allaaserineqarpoq.
Nunatta kitaani tuttoqarfiusuni tuttup kumai, Hypoderma tarandi, naammattuugassaalluarput, umimmaallu amerliartortillugit tuttup aamma tuniluuttarlutik.
Taamaammat nakorsat nalunaarusiaanni inerniliunneqartoq tassaavoq tuttut kumaat amerliartortillugit inuit taakkuninnga isinut inuunerup sinnerani ajoqusiisinnaasunik eqqugaasinnaanerat annertusiartuinnassasoq.
