Arnaq inuusuttoq hashimik poortanik 70-inik iioraalluni eqqusseriaraluartoq
Tamanna oqaluttuarineqarpoq Danmarkimi tv-qarfiup TV2-p aallakaatittagaani pinerluttulersaarummi Politirapportenimi.
Tv-qarfik nunatsinnut tikeraaqqammerpoq aallakaatitassiassanik nutaanik immiussiartorluni.
- Ullut tamangajaasa hashimik nassaartarpugut. Ilaat iioraasarput allat nassataminiititsisarput, assigiinnerlu ajorput, politiassistent Henrik Pedersen TV2-mut taama oqarpoq.
Politiassistenti Henrik Pedersen politiit qimmiat Ghandi ikiortigalugu Kangerlussuarmi mittarfimmi misissuisarpoq, TV2 taama allaaserisaqarpoq.
AAMMA ATUARUK Angut 60-inik ukiulik hashimik eqqusseriaraluarluni Kangerlussuarmi paasisaasoq
Danmarkimut naleqqiullugu 10-20-riaammik akisunerusoq
Politiit naapertorlugit ikiaroornartumik hashimik anngiortumik eqqusseriaraluartarnerit amerlanerannut pissutaavoq, ikiaroornartup haship tuniniarneqartarneratigut iluanaarutigineqarluartarmat.
Ikiaroornartoq hash tuniniarneqarnerani grammi ataaseq 500-it 1000-illu koruunit akornanni akeqarpoq, tassalu Danmarkimi tuniniarneqarneranit 10-20-eriaammilluunniit akisunerulluni, TV2 taama allaaserisaqarpoq.
TV2-ip immiussaani takuneqarsinnaavoq, arnaq inuusuttoq ikiaroornartumik hashimik poortanik 70-nik iioraasimasoq taassumalu anngiortumik eqqusseriarluni politiinit paasisaasoq.
Aallakaatitaq Politirapporten TV2-mi aggustip ulluisa 30-anni aallakaatinneqarpoq.
