Arnaq hashimik eqqusseriaraluartoq eqqartuunneqarpoq

Arnap taassuma hashi quliutit puuannut toqqoriarlugit nassataminut ikisimavai eqquteriaraluarlugillu. Ikiaroornartorli mittarfimmi qimmimit hashimik ujarlersitamit sumiissusersineqarpoq.

Arnap ikiaroornartumik eqqusseriaraluarnermi iliuuserisimasaanut atatillugu suliami pisooqataasup Nunatta Eqqartuussisuuneqarfianut nassuiaataa pineqaatissiinissamut atatillugu aamma tunngaviginiarneqarpoq.
Arnap pineqartup aningaasatigut inissisimanera oqarasuaatikkut attaveqartarsimaneranut naapertuuttut paasissutissat aamma takutippaat.

Suleqatigiillutik eqqusseriaraluartut

Arnap 33-nik ukiullip qaammatini arfinilinni pineqaatissinneqarsimasunut inissiisarfimmiittussanngortinneqartinneqarneranik Nunatta Eqqartuussisuuneqarfiata aalajangernera, hashimik 930 gramimik eqqusseriarsimasutut pineqaatissinneqarneranik sukannernerulersitsineruvoq:

- Suliamut atatillugu pissutsit pineqaatissiinermik sukannernerulersitsisut arlaqarput, Eqqartuussisuuneqarfiilu tamakku tunngavigalugit aalajangiivoq. Suleqatigiilluni eqqusseriartoqaraluarpoq, anngiortumillu iliuuseqartoqarniarnera malunnarpoq, tassami attaveqaqatigiittarnertik politiinut isertuunniarsarisimavaat. 33-nik ukiulik illersuisutut sulinermigut politiit paasiniaasarnerannik annertunerusumik ilisimasaqalersimavoq, unnerluussisussaatitaasup tusagassiuutinut nalunaarutaani ilaatigut atuarneqarsinnaavoq.

Arnaq politiinit februaarimili tigummigallagaalersimasoq, Nunatta Eqqartuussisuuneqarfiani eqqartuunneqareernermi kingorna pineqaatissinneqarsimasunut inissiisarfimmi qaammatini arfinilinni inissinneqartussatut ingerlaannaq inissinneqarpoq.