Arnaq 43-nik ukiulik toqutsisimasutut pineqaatissinneqartoq

Arnaq 43-nik ukiulik ukiuni tallimanit isertitsivimmiittussanngorluni Qaqortup eqqartuussivianit pineqaatissinneqarpoq. Pineqaatissinneqartup aappakuni savimmik kapillugu toqussimavaa.

Allattoq Kenneth Elkjær

septembarip 30-at 2016 14:57

Toqutsineq ukioq manna juunip ulluisa 18-anni Qaqortumi inissiat ilaanni katerinnermi pivoq. Angut savimmik kapineqarluni toqunneqartoq 30-inik ukioqarpoq.

Katerinnermi arnaq inissiamit aneqquneqarsimavoq, taamaaliornanili savimmik nerisassiornermi atorneqartartumik aalleriarluni angut 30-inik ukiulik sakiaasigut uummataata nalaasigut toqqutigisaanik kapisimavaa. Angut aanaarpallaarluni toqusimavoq.

Aamma atuaruk Qaqortumi arnaq toqutsisimasutut pasisaalluni unnerluutigineqartoq

Politiit unnerluussisuisa toqutsisoq ukiuni arfinilinni isertitsivimmiinnissaa kissaatigisimavaat. Pineqartullu illersuisuata ukiuni sisamani isertitsivimmiinnissaa kissatigisimallugu.

Eqqartuusiviulli aalajangersimavaa ukiuni tallimanik pineqaatissinneqassasoq. Maanna unnerluussisussaatitaasut pineqaatissinneqartullu pineqaatissiineq ingerlateqqissanerlugu eqqarsaatigaat.