Arnap periarfeerunneqarnera kilisaammut nunatsinneersumut attuumassuteqarsorineqartoq

Islandimi arnap 20-nik ukiullip periarfeerunneqarnerata Polar Seafoodip kilisaataataanut Polar Nanumut attuumassuteqarnersoq Islandimi Politiit maanna misissuiffigileruttorpaat.
Assi © : Tammy O./Flickr Creative Commons
Allattoq Anton Gundersen Lihn, Helle Nørrelund Sørensen
januaarip 18-at 2017 05:29
Nutserisoq Simon Uldum -

Islandimiut aviisiat Morgunblaðið taama allaaserisaqarpoq.

Islandimiu arnaq 20-nik ukiulik arfininngormat ullaakkulli periarfeerunneqarpoq, aqqusinermi pisuinnarfimmi Laugavegurimi kingullermik takuneqarluni.

Piffissami aqqusinermilu tassani biili aappalaartoq Kia Riomik meqqilik aamma takuneqarpoq, aviisilu Morgunblaðið naapertorlugu biili taanna Polar Nanumi inuttanit attartugaasimavoq.

Biili aamma talittarfimmi, kilisaatip arfininngornermi ullaakkut aallartup eqqaani kingorna takuneqarsimavoq, aviisi taama allappoq. Morgunblaðiðilu naapertorlugu arnap kamippai kilisaatip talinngaffiata eqqaani nassaarineqarsimapput.

Polar Seafoodimi siulersuisut siulittaasuat, Henrik Leth, KNR-imut oqarpoq ingerlatseqatigiiffiup kilisaat Reykjavikimut maanna utertitikkaa.

Polar Seafoodimi umiarsuaatinut pisortaq, Jørgen Fossheim, tusagassiorfinnut ullaaq manna allappoq kilisaammi inuttanik unnerluussisoqarsimanngitsoq islandimiullu politiivi suleqatigineqartut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq