Arnanik persuttaasarneq Nunatsinni suli takussaaqaaq
Nunattali arnartai persuttarneqarnermik akuerineqarsinnaanngilluinnartumik suli misigisaqartartut, Inuit Ataqatigiit sinnerlugit Inatsisartuni ilaasortap Naaja Nathanielsenip oqaatigaa:
FN-ip arnanik persuttaasarnermut eqqummaarinninnissamut ullorititaa 1999-imili ulloritinneqartalerpoq, kisitsisilli pigisat takutippaat ukiuni kingullerni 16-ini naammattunik allanngortoqarsimanngitsoq, Naaja Nathanielsen tusagassiuutinut nalunaarummi ilaatigut taama allaaserisaqarpoq:
- Qangalili kisitsisinit tupaallatsinneqassaarsimavugut. Nakuuserneq sungiutiinnarsimavarput. Politiit 2014-imut inigisani eqqissiviilliornernut 2836-eriarlutik orniguttarsimanerat taakkunanngalu meeqqat eqqugaasut 410-unerannik paasitinneqarnerput tupaallaatiginngilagut. Tamakkua akerliussutsimik takutitsiviuneq ajorput imaluunniit nuna tamakkerlugu immikkut iliuuseqartitsinermik kinguneqassanatik. Taamaaginnarpoq, Naaja Nathanielsen oqarpoq.
Angutit arnanik persuttaasimasut tamakkerlutik peqqissiminerisigut ikiortissarsiornerisigullu nakuuserneq aatsaat unitsissinnaavarput. Inersimasut allanngornerinik meerartagut misigisaqartissinnaagutsigit aatsaat nakuuserneq unitsissinnaavarput, aatsaallu nakuusernerup oqaatiginiakkamut taarsiullugu atorneqartarnerata pissusissamisuunnginneranik paasinnikkutta nakuuserneq unitsissinnaavarput, Naaja Nathanielsen oqarpoq, FN-illu ullorititaanut atatillugu ima naggasiilluni:
- Paasinnittuartutut akuersaarinnittutullu pissusilersorluta nakuusertarneq akiorsinnaanngilarput. Tamatta allanngortittariaqarparput, Inuit Ataqatigiit sinnerlugit Inatsisartuni ilaasortaq Naaja Nathanielsen oqarpoq.
