Arfinillit tunuarput

Siulersuisuini ilaasortat siulittaasorlu ingerlaannartumik atuutilersumik tunuartut, Partii Inuit tusagassiuutinut nalunaaruteqarput.
Assi © : Camilla Dam/KNR
Allattoq Bikki P. Kleist
februaarip 20-at 2017 07:19

Partii Inuit siulersuisuini ilaasortat siulittaasorlu ingerlaannartumik atuutilersumik tunuartut, siulittaasuujunnaartoq Per Rosing-Petersen, siulersuisuni ilaasortaajunnaartut sinnerlugit, ippassaq sapaammi februaarip 19-anni nalunaaruteqarpoq.

AAMMA ATUARUK Politikkikkut kisimiikkunnaartoq

Tunuartut tassaapput: Siulittaasup tulliata aappaa Aannguaq Poulsen, siulersuisuni ilaasortat, Frederik Lange, Jens Peter Lange, Kasper Wille, Joel Petersen siulittaasuujunnaartorlu Per Rosing-Petersen.

Per Rosing-Petersen Partii Naleqqamut uteqqikkumalluni nalunaaruteqarpoq.

Partii Inuit siulittaasorigallagaat Pauline Mølgaard allappoq, siulersuisuni ilaasortat ilaannit Partii Naleqqamut nuunnissaq kissaatigineqarmat siulittaasoq Per Rosing-Petersen siulersuisunilu ilaasortat sisamat partiimit ilaasortaajunnaarput.

AAMMA ATUARUK Per Rosing Petersen Partii Inuit siulittaasortaarivaat

Per Rosing-Petersen Partii Inuit ataatsimeersuarneranni siulittaasutut 2016-imi decembarip 20-ani toqqarneqaraluarpoq.