Politikki Avatangiisit

Arfernut eqqissisimatitsiviliornissamik siunnersuut itigartitsissutigineqartoq

Atlantikup kujasissortaani arfernut eqqissisimatitsivimmik pilersitsisoqarnissaanut siunnersuut, nunat arfanniartartut Japan, Norge Islandilu siuttoralugit, Arfanniarneq pillugu Ataatsimiititaliarsuup, IWC-p, Sloveniami ataatsimeersuarnerani itigartitsissutigineqarpoq.

Allattoq Karsten Sommer

oktobarip 26-at 2016 05:37

Atlantikup kujasissortaata ilaani arfernut eqqississimatitsiveqarnissaa nunat latinamerikameersut Afrikameersullu ilaat siunnersuutigigaluarpaat, imartap 20 millionit kvadratkilometerisut annertutigisup arfernut eqqissisimatitsiviunissaa siunnersuutaalluni.

Nunat pineqartut EU-mit, Danmarkimiillu nunanillu allanit tapersersorneqarput, amerlanerussuteqarsinnaasimanatilli.

Aamma atuaruk Atlantikup kujasissortaani arfernik eqqissisimatitsiveqalernissaq assortuussutaasoq

Eqqissisimatitsiviliortoqarniannginnerali ajuusaarutigineqartariaqanngitsoq, biologip arferit pillugit immikkut ilisimatusarsimasup Karl Kinzep oqaatigaa.

Taamatulli siunnersuuteqartoqarnera takussutissaannartut isigisariaqartoq aamma oqaatigaa:

- Arferit pillugit annerusumik ilisimaqartoqaraluarpat pitsaanerussagaluarpoq, sumi piaqqiortarnersut, sumullu ingerlaartarnersut ilisimasaqarfigalugu, asuli eqqissisimatitsiviliuinnarnani, Karl Kinze oqarpoq.

Arfernulli eqqissisimatitsiviliortoqarniannginnera John Frizellip, Greenpeacemeersup, ajuusaarutigaa.

Arferit ukiorpassuarni piniagaasimanerat pissutaalluni ikiliartupiloorsimasut taassuma franskit nutaarsiassaqartitsiviannut AFP-mut oqaatigaa. Arfernullu eqqissisimatitsiviliornissaq pisariaqarsoraa.

Arfernut eqqissisimatitsivimmik pilersitsisoqarnissaa 2001-imili ukiut tamaasa siunnersuutigineqartarsimavoq, IWC-milu amerlanerussuteqartunit maanna aamma itigartitsissutigeqqinneqarluni.