VIDEO Arfermut aportut
- Takugakku ingerlaannaq paasivara susoqalernersoq. Ajortoqalerpoq, umiatsiamik aquttoq, Angerla Korneliussen, eqqissisimasumik angalaniugaluartoq pillugu taama oqarpoq.
Angerlannguaq Skade tassani aamma ilaavoq.
- Qatsungasorujussuarmi angalaartilluta, puisinniareerluta Uummannamut uteqqinnialerluta, ingerlalluta saatungitsinni soqanngiivittoq, taava ingerlanitsinni puiffigeriasaarpaatigut, Angerlannguaq Skade oqarpoq.
- Immaqa 3 meterit missaanni ungasissuseqarluni nuivoq.
- Nilliavunga. Suaarpunga "Takuuk unarsuaq!". Taava aporpugut. Angerlannguakkullu katataallutik, Angerla Korneliussen oqarpoq, arferlu tikaagulliusaajusoq oqarluni.
AAMMA ATUARUK Angallatip arfeq aporaa
Umiatsiamit nakkartut
Angerlannguaq Skadep pisoq tamaat eqqaamanngilaa.
- Eqqaamasara siulleq qangatallunga, qummukariartorlunga. Qilak isigalugu. Taava tigusiniarsarigaluarpunga, assakka, talikka tunumut saatsillugit. Kisianni tigusaqanngilanga, Angerlannguaq Skade oqaluttuarpoq.
Eqqaamasaatalu tullia tassaavoq aqqaamalluni.
- Taava immap iluaniillunga, taartuinnarmiillunga, taanna apugarput arriitsuararsuarmik ingerlasoq isigaara.
- Isigalugu assorujussuaq ersinarpoq. Soorlumi tungitsinnut ornigutissasoq. Tupallunga qummukarlunga eqqaamavara. Qummukaannarlunga eqqaamavara, Angerlannguaq Skade oqarpoq.
AAMMA ATUARUK Alapernaarsuut "Vædderen" tikaagullimmut aportoq
Umiatsiap kivisimanissaa ernummatigigaa
Aamma alla immamut nakkarpoq. Angerlannguaq Skade nalussinnaavoq, aappaajunngitsorli. Angerlannguaq Skadep immameeqatimi atisaatigut tigoriarlugu puttatinniarsaraa. Tamannali iluaqutaanavianngitsoq ernummatigilersimagaluarpaa.
- Umiatsiaq ajutoorsimassappat tamatta annattussaqarata isumaqaraluarama.
Umiatsiarli suli puttavoq, Angerla Korneliussenillu orneriarlugit ikivai.
- Immamiipput sivisunerpaamik 1 minutsi sinnilaarlugu, Angerla Korneliussen oqarpoq.
Ajoqusersimasoq
Angerlannguaq Skadep umiatsiamut qaqimmat ajoqusersimalluni paasivaa. Saarnga tikingajallugu ikilersimavoq, immamiinnerminilu qanoq taama nukini atorsinnaatigisimanerini ullumi eqqarsaatigisarpaa. Timimigulli kisimi ajoqusinngilaq.
- Sequnngerlungalu immamut qernertuinnarmut taartuinnarmut pisarama. Taavalu sininnissara qunugalugu, Angerlannguaq Skade oqarpoq, ullumili iluarsiartuaarluni oqarluni.
