VIDEO Arctic Sounds Festival - festivali alliartuinnartoq

Arctic Sounds Festival 2015 ullut sisamat ingerlaneriinnaanni tusarnaartitsiviit sisamat atorlugit tusarnaartitsinerit 50-init amerlanerusut aaqqiissuuppai. Nipilersoqatigiit Nunatsinneersut, Islandimeersut, Savalimmiuneersut, Sverigemeersut, Norgemeersut Danmarkimeersullu tusarnaartitsipput.

AAMMA ATUARUK Arctic Sounds Festivalip piareersaatini naammassivai

- Siorna siullermeerami misiliutaagami, taava siorna iluatsilluarmat tunngavissaqarnerugatta amerlanernik qaaqqusinissatsinnut. 

- Aamma siunissaq eqqarsaatigalugu neriuutigaarput Sisimiuni unnuiffissat amerlineqarsinnaasuuppata inuit amerlanerusut maanngartissinnaassallugit, aaqqissueqataasoq Nuka Alice Lund KNR-imut taama oqarpoq.

Nunat avannarlermiut ataatsimoorlutik pikkorissaqatigiinnerat

Festivalimut aallarniutitut nipilersortartut nunat avannarlermiut ataatsimoorlutik taalliornermik pikkorissaqatigiipput.

-  Nuannertorujuuvoq. Soorunami atoreeraluarpagut uatsinnuinnaq, kisianni koncertivittut atorlugu aamma misigisaq nuannerpoq. Taavalu inuit naggataatigut oqarfigigaannga "torrak, kalaalerpaluttumik akulerussatit pingaaruteqarput nuannit". Pissarsiaqarnartorujuuvoq, pikkorissaqataasoq Kaaleeraq Andersen KNR-imut taama oqarpoq.

Pikkorissarneq aamma suleqatigiinnerulernissamut ilisarisimanerulernissamullu periarfissiissaaq, aqqutissiuussisinnaallunilu kalaallit nipilersortartuinut nunani avanarlerni tusaamasaanerulernissamut, aaqqissuisut taama ilisimatitsipput.

- Tusarnaarlugit nuanneq, sequnngiinnartarluni ilaannikkut klangii tusarnaarlugit inimilu energi tunniussaat nuannernermik, tusarnaariat nuannisarluarsimasut ilaat, Birthe Olsen, taama oqaluttuarpoq.

Festivali pillugu videonngorlugu ilanngutassiaq qulaani isiginnaarneqarsinnaavoq.