Arctic Prime Fisheries eqqugaasoq
Kujataani aalisakkat tunisat ikileriarujussuarput tamatumalu kinguneranik Kommune Kujallermi suliffissaaleqisoqarnerulerluni.
Aalisakkat pisassiissutillu amigaataaneri kilisaatillu amutsivimmiinnera ilaatigut pissutaallutik Qaqortumi tunitsivik ukioq manna suliassaqarpiarsimanngitsoq, ingerlatseqatigiiffiup Arctic Prime Fisheriesip, Qaqortumi Nanortalimmilu tunitsiviuteqartup, pisortaata oqaatigaa.
Ingerlatseqatigiiffiup Arctic Prime Fisheriesip Qaqortumi sulisui siorna amerlanerusimagaluarput:
- Tamakkerlugit maani suligaangata inuit 60-it angullugit maskiinat marluk ingerlatillugit angallatillu marluk tulaassuitillugit sulisarput. Taavalu angerlartitsisarneq qaqutigoortuulluni.
Inuillu tallimat missaannaaniittut maanna sulisorineqartut, Arctic Prime Fisheriesimi pisortaq, Malakias Andreassen, oqarpoq.
- Qaqortoq ukioq manna uninngaannarallarpoq taamaanneralu nuanneeqaaq.
Kalaallit Nunaanni Aalisarsinnaanermut Akuersissutinik Nakkutilliisoqarfiup kisitsisaatai naapertorlugit tunisat 2016-imi 910 tonsiusut ukioq manna 31 tonsiinnaapput.
AAMMA ATUARUK Kujataani tunisat ikileriarujussuartut
Pisortaq naapertorlugu kujataani aalisakkat ikilinerat peqqutaaqataavoq. Aalisakkallu nuussimanissaat ilimagigitsik, Malakias Andreassen oqarpoq:
- Siorna aalisarfigisatsinni isumalluarsimatigaluta, aalisarfigisatsinni aalisakkat ajoraluartumik taamak amerlatigiunnaarsimapput.
Pisortap ilanngullugu paasissutissiissutigaa ingerlatseqatigiiffiup kilisaataataa amutsivimmiimmat aamma aalisarsinnaanngitsut.
Taamaammat Arctic Prime Fisheriesip Nanortalimmi tunitsivini, naak tassani tunisat aamma ikiligaluartut, ingerlannerusimavaa.
Kommunimut aningaasartuutaasoq
Qaqortumi tunisat ikilerujussuarnerat kommunip karsianut aningaasartuutaavoq. Suliffissaaleqisoqarnerulerneratigummi kommunip isumaginninnermut aningaasartuutai amerlanerulerput.
Kommunillu neriuutigaa Qaqortoq Fiship pisassiissutissani tigussagai aalisarsinnaanermullu akuersissummik tunineqarluni.
Qaqortoq Fish Qaqortumi aalisartunit pilersinneqarpoq, pisortarlu naapertorlugu ingerlatseqatigiiffik aalisariartariaannaavoq.
- Ulluni qaninnerpaani tunineqarutta piaartumik aallartissagaluarpugut, taakkua pisassat tunniunneqartut ukioq naatinnagu naammassiniarsariniarlugit, Qaqortoq Fishimi pisortaq Gerhardt Petersen oqarpoq.
