ASSIT Arctic Circle Racemi ingerlaarnissap taamaatinneqarnera naapertuilluarneruvoq

Arctic Circle Racemi siulersuisut upalungaarsimanermut pilersaarut maleqqissaarlugu, sapaatiummat ullaakkut ujakkaarfigineqartussap pingajuat kingullersaallu taamaatittariaqarsimavaat.
marsip 23-at 2015 16:31
Nutserisoq Ulf Fleischer

Arfineq marluinnarnik issikkaluartoq anori akunnermut 44 km-inik sukkassuseqarmat 24inik issittutut issinnerusutulluunniit malunnassaaq.

 - Toqqit ilaat, peqataasut ilaata siniffigisaa tingitaaleraluarpoq. Toqqillu anneri teqqalernissaat aamma aarlerinarsigaluarluni. Ullullu ingerlanerani ujakkaartut qaffasissumut pigunik taamaallaat siumut meterit marlussuinnaat takusinnaassimassangaluarpaat.

- Taamaammat unammineq unitsipparput, angerlaassuinissarlu aallartillugu. Suullu tamarmik pissusissamissut ingerlapput, Arctic Circle Racep siulittaasua, Jens Klaus Lennert, KNRimut oqarpoq.

Aamma atuaruk Arctic Cirle Race sakkortuumik anorlernera pissutigalugu taamaatinneqarpoq

Unamminermi siulersuisut upalungaarsimanermut pilersaarutaat pingasoqiusatut aaqqissugaavoq – Siulliullertut fase 1imi tassaallutik unamminermi piumasaqaatit nalinginnaasut, tulliulluni fase 2mi silarlulernerani, immikkut sissuertariaqarfik kiisalu pingatsiullugu fase 3mi silarlunnerani unammineq ingerlanneqarsinnaajunnaarpat.

 - Sapaatiummat illoqarfimmi fase 2 anguneqarpoq unnuiffissamilu fase 3 angunearluni, Jens Klaus Lennert oqarpoq, taassumalu anorersualernerani iliuutsitik assut iluarisimaarpai.

Taamaammat peqataasut snescooterinik ujakkaartunullu aqqusinniuummik Sisimiunut oqqunneqarput. Maanna taava aserukkat naatsorsulissavagut, qimerluualaareerugit ilimanarpoq 250.000 koruunit sinnilaarlugit naleqarnissaat.

Møller pissartanngoqqippoq
Pingajussaannik ingerlaarnissap taamaatinneqarneratigut marloriarluni ingerlaareernermi angusat tunngaviussapput.

Taamaalilluni Martin Møller isorartuneq akunnerni 6.33,49-ni ingerlallugu, Nuna Sinnerlugu Unammisartoqatiminit Karl-Peter Kristensenimit akunneq ataasingajak siulliungaatsiarluni apuuppoq. Tomas Caslavsky, Tjekkiameersoq siulliit pingajuattut apuuppoq.

 Arnani Kamila Borutova Tjekkiameersoq akunnerit 8.19,02-t atorlugit ajugaavoq – amerikamioq akunnernik marlungajannik sioqqullugu kalaalerlu Marie Lundblad siulliit pingajuattut apuulluni.

Aamma atuaruk Martin Møller Arctic Circle Race-mi siuttunngorsimavoq

 Qaninnermut ujakkaartut akornanni kalaaliinnaat angutini siulliupput, Vittus Heilmann ajugaammat Pavia Tobiassen kisialu Ivik Jensen sioqqullugit, Arctic Winter Gamesip pisortaa, Maliina Abelsenip arnat qaninnermut ujakkaarneranni ajugaavoq Simigaq Broberg kiisalu Karen Vindfeld sioqqullugit.

 Uani angusat tamaasa takukkit.