Aqutsisooqatigiit namminersortunngorsaanermi siuttuussapput

Royal Greenlandimi immikkut ittumik ataatsimeersuarmat oqaluuserisat aapparaat, suliffeqarfissuup namminersortunngorsarneqarnissaa. Suliffeqarfiup namminersortunngorsarneqarnissaa kinguartinneqarpoq. Namminersortunngorsaanissarli pillugu aqutsisooqatigiinnik misissueqqissaartussanik, Namminersornerullutik Oqartussat pilersitsipput. Naalakkersuisut tamatuma saniatigut naatsorsuutigaat Royal Greenlandip, aalisarnermik ingerlatsiviit siuttuattut, paasissutissiisarnini ingerlatiinnassagaa.

Royal Greenlandimi immikkut ittumik ataatsimeersuarnermi, siulittaasussatut toqqarneqarpoq KNAPK-ip pisortaa Paaviaaraq Heilmann. Siulersuisuni ilaasortat allanngunngitsut siulittaasup tullia ulluni qaninnerni inuttalerniarneqarpoq. Ataatsimeersuarnermi oqaluuserisat marluupput, tassalu siulersuisuni siulittasumik nutaamik toqqaaneq kiisalu Royal Greenlandimik namminersortunngorsaanissamut tunngatillugu iliuuseriniakkat.

Suliffeqarfissuup namminersortunngorsarneqarnissaanik misissueqqissaartussat Aqutsisooqatigiit pilersinneqassasut Namminersorneq pillugu naalakkersuisup saqqummiuppaa. Aqutsisooqatigiit Naalakkersuinikkut qinikkanik arlalinnik inuttalerneqassapput.

Aqutsisooqatigiinni, Royal Greenlandip siulersuisuini siulittaasoq, taassuma saniatigut Naalakkersuisut sisamat, tassa Namminersornermut Naalakkersuisoq, Aalisarnermut Naalakkersuisoq, Inuussutissarsiornermut Naalakkersuisoq kiisalu Aningaasaqarnermut Naalakkersuisoq ilaasortaassapput. Aqutsisooqatigiinni siulittaasuussaaq Namminersornermut Naalakkersuisoq Jørgen Wæver Johansen.

Royal Greenlandip namminersortunngorsarneqarsinnaanissaanik Aqutsisooqatigiit suliassaraat, suliffeqarfiup tamakkiisumik ilaannakortumilluunniit namminersortunngorsarneqarsinnaanera pillugu suliffeqarfimmik piginnittup, tassa Namminersornerullutik Oqartussat naatsorsuutigisaannik misissueqqissaarnissaq piereersarnissarlu.

Namminersortunngussaanermi Aqutsisooqatigiit, nunat nillertumik imartaqartut raajartassaannik aalisagartassaannillu pisassiisartut neqerooruteqartartullu akornanni qaninnerusumik suleqatigiinnissaannut iluaqutaasinnaasut iluaqutaanngitsullu aamma nalilersussavaat.

- Taamaalilluni nunarsuarmi nuierfimmi neqerooruteqarnissat piserusussuseqarnerlu annertunerusumik sunneeqataaffiginiarlugit, Jørgen Wæver Johansen oqarpoq. Aqutsisooqatigiit Royal Greenlandi namminersortunngorsarneqassappat pitsaaqutaasut pitsaanngequtaasullu pillugit nalunaarusiussaaq kiisalu suliap aallartinneqarnissaanut kingusinnerpaamik aappaagu juunip naanerani siunnersuuteqareersimassallutik.

Naalakkersuisut aalisarnermik inuussutissarsiuteqarneq pillugu ingerlaavartumik misissuissasut, Jørgen Wæver Johansen-ip oqaatigaa tamatumunngalu tunngatillugu oqaatigaa misissueqqissaarnissamut pitsanngorsaanissanut kiisalu naalakkersuisut Inatsisartullu aalajangiinissamut tunngavissaannik kisitsisinik paasissutissanillu ingerlaavartumik Royal Greenlandip paasissutissiisarnissaa Naalakkersuisunit naatsorsuutigineqartoq.

Nunatsinni suliffeqarfissuarnik pitsaasumik aqutsinissaq pillugu innersuussutaavoq suliffeqarfinni siulersuisut suliffeqarfiup qullersaqarnikkut ingerlanneqarnerani aqutsisuussasut, taamatuttaarlu suliffeqarfimmi pisortassanik toqqaasarlutillu suliffeqarfiup ingerlanneqarneranik nakkutilliissallutik.

Aqutsilluarnissamut Innersuussutigineqarportaaq suliffeqarfimmi siulersuisut, siunissaq ungasinnersoq eqqarsaatigalugu pilersaarusiornermi siunniussallu tungaasigut aalajangiisuussasut malittarinnillutillu.

Royal Greenlandip namminersortunngorsarneqarnissaanut Aqutsisooqatigiit saniatigut suleqatigiissitaq pilersinneqassaaq. Suleqatigiissitaq  pisortaqarfinni aqutsisooqatigiinnut ilaasortaatitaqarfiusunit atorfilittanik sisamanik suliffeqarfissuullu pisortaqarfianeersumik ataatsimik inuttaqassaaq.

Namminersorneq pillugu naalakkersuisup Jørgen Wæver Johansen-ip aqutsisooqatigiit qaqugorpiaq ataatsimeerngaarnissaat oqaastigisinnaannginnerarpaa taamaattorli ataatsimiinnissap piaartumik pinissaa oqaatigalugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!