Kujataani UNESCOP eriagisassanngortitaa Aqqussiniliornissaq isernermilu akiliisalernissaq takorloorneqarput
Kujataani nunap ilaa UNESCO-p nunarsuarmi eriagisassanngortitat allattorsimaffianut ilanngunneqarpat, kommune Kujalleq annertuunik pilersaaruteqarpoq.
Nunarsuarmi eriagisassanngortitanukarnissaq ajornannginnerulissaaq aamma aqutsisoqalissaaq.
AAMMA ATUARUK UNESCO-mi ilanngunneqarneq pisussaaffiliivoq
- Eriagisassanngortitami UNESCO-p atorfeqartitaannik ulluinnarni aqutsisoqassaaq, Kommune Kujallermi kommunaldirektøriugallartoq Kenneth Høegh taama oqarpoq - takornariat amerlanerit takkuttarnissaat naatsorsuutigineqarpoq, taakkualu orninneqarsinnaanerat ajornannginnerusariaqarpoq, Kennet Høegh oqarpoq.
Aqqusiniornissarlu takorluukkanut ilaavoq.
- Qaqortumiit Qaqortukuluup eqqaata tungaata tungaanut aqqusiniliornissaq siunissami sananeqarnissaa takorloorneqarpoq, Kommune Kujallermi kommunaldirektøriugallartoq oqarpoq.
AAMMA ATUARUK Kujataa eriagisassat allattorsimaffiannut ilanngunneqarpoq
Eriagisassanngortitat paarilluarneqarnissaat pingaaruteqartoq .
- Siullermik soorunami paarilluartariaqarput naatsorsuutigissavarput siunissami takornariat amerlasuut takkuttarnissaat, Kenneth Høegh oqarpoq.
Ukiut arlaqartut qaangiuppata eriagisassanngortitat orninneqartinnagit paasissutissiisarfimmik qallunaatut misigisassarsiorfimmik peqalernissaq kommunemit takorloorneqarpoq.
Takornariat eriagisassanngortitanukartut akiliisittalernissaat kommunip takorluugaasa ilagaat.
- Eriagisassanngortitanut iserneq takornarianut nunanit allaninngaaneersunut akeqarnissaa takorloorparput, Kenneth Høegh oqarpoq.
Eriagisassanngortitanut kommunip pilersaarusiai, Naalakkersuisut Nunattalu katersugaasivia suleqatigalugit suliarineqarput.
Kujatani sumiiffiit aalajangersimasut tallimat nunarsuarmi eriagisassanngortinneqassapput, siullermik qallunaatsiaat najugaqarfigisimasaat kingorna nunalerinermik piniarnermillu inussutissarsiorfinngortut.
Eriagisassanngortinneqartussaq issittumi nunaleriffiusimasutut aamma qallunaatsiaanit europaminngaaneersuunngitsunit nunasiffigineqarsimasutut oqaluttuarineqartarpoq.
AAMMA ATUARUK - Suliassat aatsaat aallartilerput
AAMMA ATUARUK Issittumi sumiiffiit arlallit nunarsuarmi eriagisassanngortitassatut piukkunneqartut