Aputip sisoorneratigut ajunaartoq

Angut 27-nik ukiulik Kangerluarsunnguami aputip sisoorneratigut matoorussaalluni arfininngornermi ajunaarpoq.

Qamuteralaatillit peqatigiiffianni, Qamutini, angutip inuusuttup qamuteralatsilluni ajunaarneranit ulloq ataaseq qaangiuttoq tupaqqasorujussuupput.

- Qanoq iliorsinnaannginnermik aqaguani misigisaqarpugut, Peqatigiiffimmi Qamutini, ajunaartup ilaasortaaffigisimasaani siulittaasoq, Mikkel Andreasen oqarpoq.

27-inik ukiullip kammalaatai politiinut arfininngormat nalunaaqutaq 13:20 nalunaarput, ajunaartorlu kisimiilluni qamuteralassimasuuguni immaqa nassaarineqarnavianngikkaluartoq Nuummi politiineersoq, Brian Thomsen TV-2-mut oqarpoq.

Piareersarnissaq pingaaruteqartoq

Taamaammat pinngortitamut angalaniaraanni arlalinnik eqqumaffigisassaqartoq, qamuteralaatillit peqatigiiffiannit oqaatigineqarpoq.

- Qanoq iliornissamut piareersaateqarpoq. Kisimiilluni aallartoqanngisaannassaaq, atortorissaarutinik aputip sisoornissaanut mianersoqqussuteqarsinnaasunik nassartoqartassaaq, soorlu assersuutigalugu aputimik sisoortoqarnerani siggaarartaatiusinnaapput, nivaatamillu nassartoqartuaannassaaq, Mikkel Andreasen oqarpoq.

Silallu kiassusia allanngoqattaarsimappat sivinganerit namminermut sammisut immikkut nakkutigisassaapput.

- Issangiarsimappat, qaavatigullu aqitsumik aputeqalersimappat, taava aput sisooriaannaasarpoq. Tamanna takujuminaassinnaasarpoq, sivinganerillu aarlerinanngitsutut isikkoqarsinnaasarput. Kisianni aputingaatsiarujussuaq qaqqap sivingarnatigut sisooriaannaasinnaavoq, taakkununngalu imminut illersortoqarsinnaanngilaq, Mikkel Andreasen oqarpoq.

AAMMA ATUARUK Qaqortumi aput sisooqqippoq

Qamuteralallaqqissoq

Peqatigiiffik naapertorlugu, 27-nik ukiulik qamuteralallaqqissupilussuugaluarpoq.

Taassumalu alianartumik ajunaarnera ilikkagaqarfigineqarnissaa pingaartoq, Qamutini siulittaasoq isumaqarpoq.

- Tamatta isumannaallisaatinik arlaannik atortorissaaruteqarpugut. Soorlu atisat timitsinnut illersuisut, atortorissaarutinik aputip sisoornissaanut mianersoqqussutaasinnaasut akisaasallu pullattartut, aputip sisoornerani inuk illersorlugu pullassinnaasut. Atortorissaarutinik atuinissamut pikkorinnerulerutta immitsinnut illersorsinnaanerulissaagut, Mikkel Andreasen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!