Appanniarneq miterniarnerlu ammaanneqarput

Ulloq amerlasuut qilanaarlutik utaqqisimasaat nalliuppoq. Ullumikkummi oktobarip 15-iani appanniarneq miterniarnerlu ammaanneqarput.
Assi © : Blake Matheson/Flickr Creative Commons
Allattoq Simon Uldum -
oktobarip 15-at 2015 11:04

Appanniarnermi miterniarnermilu malittarisassat sukannersut atuupput. Timmissat illersorneqarnerat piniagaanerallu pillugit nalunaarut nr. 8, 2. marts 2009-meersoq malillugu piniarnermi maleruagassat atuuttut naapertorlugit inuussutissarsiutigalugu piniarnermut allagartallit ullormi aallaaniarfiusumi ataatsimi timmissanik ataatsimut katillugit 30-nik pisaqaqqusaapput sunngiffimmilu aallaaniarsinnaanermut allagartallit ullormi aallaaniarfiusumi ataatsimi timmissanik ataatsimut katillugit tallimanik pisaqaqqusaallutik.

Ulluni aallaaniarfiusuni aallaaniarfiunngitsunilu pisassiissutit pisarinngitsuukkat pissamaasiunneqarsinnaanngillat.  Pisassiissutit inuup nammineq pigisarai allanullu tunniunneqarsinnaanatik.

 

Piffissat piniarfiusinnaasut
Nunap Isuaniit Qeqqata Kommuniata avannamut killeqarfianut piffissat piniarfiusinnaasut imaapput:
•    Appa: oktobarip 15-ianit februaarip 28/29-ianut
•    Appa siggukitsoq: oktobarip 15-ianit februaarip 28/29-ianut
•    Miteq siorartooq: oktobarip 15-ianit marsip 15-ianut
•    Miteq siorakitsoq: oktobarip 15-ianit februaarip 28/29-ianut

Qeqqata Kommuniata avannamut killeqarfianiit Qaanaami avannamut killeqarfianut Tunumilu:
•    Appa: septembarip aallaqqaataanit februaarip 28/29-ianut
•    Appa siggukitsoq: septembarip aallaqqaataanit februaarip 28/29-ianut
•    Miteq siorartooq: oktobarip 15-ianit marsip 31-anut
•    Miteq siorakitsoq: oktobarip 15-ianit februarip 28/29-anut