VIDEO Appa qaqortuinnaq

Piniartut takornakkaminnik pisaqarsimallutik tikittut qaqutigoortuupput, tamannali ataasinngormat pivoq. Pisarineqartorlu appaanersoq imaluunniit timmiaq allarluinnaanersoq Pinngortitaleriffimmut naliliiffigitinneqartariaqarsimavoq.

Allattoq Camilla Dam, Jørgen Semionsen

novembarip 25-at 2014 11:58

Timmiaq angissutsimigut appamut assinguvoq, qaqortuinnaavorli, taamaammat arlallit tassaasorigaluarpaat appa ukaleriaq.

- Aatsaavissuaq taama ittumik takuvunga. Appamit allaanerussuteqarpoq. Anguffatai, sului minngerunngitsumillu isai pissutigalugit. Albinommi aappaluttunik iseqartarput, Tittus Danielsen KNR-imut oqarpoq.

Timmiaq sananeqaatsimigut akornutilik
Timmiaq qaqortuinnaq assilisaarsinnarlugu assit immikkut ilisimasalimmut naliliffigisassanngorlugit nassiunneqarput, akissutaalu erseqqippoq.

- Appaavoq sananeqaatsimigut akornutilik. Timmissat taama ittut leucistiskenik taaneqartarput (uumasut qalipaatimikkut akornutillit, aaqq.). Timmissat taamatut akornutillit qaqutigoortupilussuupput, taamaammat albinonasorineqartarnerat tupinnanngilaq. Isaalli aappaluttuunngillat, taamaattumillu albinonatik.

Aamma atuaruk Tulukkamik qaqortumik pisaqartoq

Aamma atuaruk Tulugaq qaqortoq albinoonngilaq

Sananeqaatsimigut akornuteqarnini pissutigalugu appanut allanut naleqqiullugu allaanerusumik qalipaateqarpoq, Pinngortitaleriffimmi ilisimatuut ittuat, Lars Witting taama oqarpoq, ilanngullugulu oqaatigaa ataasiaannarluni taama ittumik takusimalluni.

Timmiaq qaqutigoortoq sananeqaatsimigut akornuteqarnini pissutigalugu allaanerusumik mamassuseqarnersoq nerisup kisimi oqaluttuarisinnaavaa.