App nutaaq Nuummi takornarianut ilitsersuutaassasoq
Sumi nerisinnaavugut, katersugaasiviit sumiippat aamma illoqarfimmi susoqassava? Tassaapput takornariat Nuummut tikittartut paaserusuttagaasa ilamininngui.
- Appimik atulersitsinitta siunerataa Nuup illoqarfittut takoriartarfittut ammanerulersinnissaa. Nuup avataanit tikittuulluni angalaffigissallugu ajornakusoorsinnaavoq, Sermersooq Businessimi inuussutissarsiornermi siunnersorti Stine Selmer Andersen taama oqarpoq.
Sermersooq Business Council appimik ineriartortitsisuuvoq, taannalu oqarasuaatini angallattakkani iPhoneni Androidinilu atorneqarrsinnaavoq. Appi Vestnorden Travel Martip ulluani siullermi saqqummersinneqarpoq.
Appimik ineriartortitsinissamik isumassarsiaq nunanit allaneersuuvoq, illoqarfissuarnimi takornarianut nassuiaassisussatut ukiorpassuarni atorneqarsimavoq.
- Inuit illoqarfimmi sumunngarfissaminnik ujaasissagaangamik oqarasuaatitik angallattakkat atussallugit sungiusimavaat. Taamaammat ajornannginnerulersinniarlugu appiliorpugut, taamaaliornikkullu aamma takornariat pisariaqartitaannut naleqqussarluta.
AAMMA ATUARUK Nunarput takornarialerisut saqqummersitsineranni saqqummersinneqarpoq
Stine Selmer Andersen naapertorlugu, appi oqarasuaat attaveqanngikkaluartoq aamma atorneqarsinnaavoq, takornariallu taamaalillutik aamma datamik atuinerminnut roamingimik akisuumik akiliisariaqanngillat.
Takornarianik ilitsersuussinerup saniatigut Sermersooq Business Councilip aamma neriuutigaa illoqarfissuarmi innuttaasut appi iluaqutigiumaaraat. Taannami pisussanut ullorsiuteqarpoq Nuullu silaata qanoq innissaanik aamma ilimasaarutitaqarluni.
Appip Vestnorden Travel Martimut peqataasunit downloaderneqarnissaa neriuutigineqarpoq, appi qanoq innersoq taakkunannga tusagaqarfigineqarniassammat.
- Naammasseqqammerpoq, taamaammat aamma aatsaat massakkut atuisut qanoq igineraat aammalu sutigut pitsanngorsarsinnaaneripput tusallattaalerparput, Sermersooq Businessimi inuussutissarsiornermi siunnersorti Stine Selmer Andersen taama oqarpoq.
