Anthon Frederiksenip 2009 siusippallaarsoraa
Aaqqissuussaanermut Isumalioqatigiissitat suliamik qiteqqunnerani nassuiaasiaat inatsisartuni partiinit tamanit naammagisimaarneqarpoq, Kattusseqatigiinnilli amigaateqarsorineqarluni. Anthon Frederiksen oqarpoq kommunit nutaamik aaqqissuuteqqinnissaasa 2009-mi naammassereersussaanera siusippallaartoq, imalu tunngavilersuilluni:
- Nalunarluinnarpoq, imaassinnaavoq angumerineqarsinnaasoq, kisianni isumaqarpunga uani pingaaruteqarluinnartoq massakkut suliniuitineqartoq aammalu misissorneqartut assigiinngitsut tassalu kattussinnaanermi iluaqutaasinnaasut akorutaasinnaasullu apeqqutaalluinnartussaapput. Kattussinnaanermi iluaqutissat ajoqutissaninngaanniit amerlaneruppata soorunami pilerinassaaq, ajoqutissartaali amerlanerussappata kattuttoqarnavianngitsoq naatsorsuutigineqarsinnaavoq.
Anthon Frederiksenip assersuutigalugu eqqaavaa namminneq Ilulissat kommuniannit Qasigiannguit kommuniannik ukiuni tallimani akissarsialerinikkut akileraarutitigullu suleqateqarsimanertik pitsaaquteqaraluartoq sutigut tamatigut suleqatigiinnissaq kattunnissarluunniit siusiginartoq, piffissaqarluarluni kommuninut aningaasakilliortunut aningaasaateqarnernullu pitsaaqutissat ajoqutissallu oqaluuserisariaqartut unnerlugit.
-Paasissutissat pingaarutillit aamma soqutiginarluinnartut isumaqarpunga maannakkut Kalaallit Nunaanni kommunini ilisimaneqarpianngitsut piareersimaffigalugillu sillimaffigineqartariaqartut, Kattusseqatigiit sinnerlugit inatsisartuni ilaasortaq taama oqarpoq.
Aaqqissuusseqqinnissamut isumalioqatigiissitat aappaagu ukioq ilanngullugu sulissapput. Maannamullu siunnersuutaasa ilaat, tassalu akileraarnermut tunngasut kommuninit namminernit aqunneqarunnaarlutik qitiusumit aqunneqalernissaannik siunnersuutaat aamma sanaartornerup qitiusumit aqunneqarunnaarluni kommuninit namminernit isumagisassanngortinnissaa, inatsisartuni partiit tamarmik isumaqatigaat, oqarlutik isumalioqatigiissitat maannamut suliaat naammaginartut, aappaagulu nassuiaatissaat pissangallutik utaqqissagitsik.
Naalakkersuisut siulittaasuat Hans Enoksen isumaqarpoq kommunit aaqqissuussaanerisa allannguutissai 2009-mi pinngitsooratik atuutilertariaqartut, Namminersornerullutik Oqartussat kommunillu allaffissornermut ukiumut aningaasartuutigisartagaat maanna koruunit milliardit ataatsit pallillugit amerlassuseqalersimammata.
