Anita Hoffer: Ammasumik pissuseqarnissaq eqqaamallugu
Naak Namminersorlutik Oqartussani atorfiit qaffasissumi inissisimasut politikkimut attuumassuteqartutut aaqqisuussaanngikkaluartut, taakkunani inissisimasut allanik taarsertarput.
Naalakkersuisunngortussallu qaffasissumik atorfinitsitisarsinissaminni ammasumik pissuseqarnissaat Transparency Greenlandimi siulittaasup Anita Hofferip maanna kaammattuutigaa.
- Naalakkersuisunngortussat atorfinni qaffasissuni inuttaliissagunik atorfinitsitsinissamut suliap ingerlanerani ammalluinnartumik pissuseqarnissaat pingaaruteqarpoq. Piginnaasat suut ujartorneqarnersut ersarissuusariaqarput, taavalu atorfinitsinneqartoq ilumut ujartorneqartunik piginnaasdaqartoq takuneqarsinnaasariaqarpoq, Anita Hoffer, Trasparency Greenlandimi siulittaasoq, isumaqarpoq.
Taassuma qaffasissumik atorfinitsitsinerit ammalluinnartumik pisarsimanersut apeqquserpaa.
Atorfinitsitsineq apeqquserneqartoq
Ukioq kingulleq siulittaasup naalakkersuisoqarfiani pisortamik atorfinitsitsineq pissusissamisoortumik pisimanngitsoq qallunaat aviisianni Berlingskemi allaaserineqarpoq.
Atorfinitsitsinerulli pissusissamisuunnginnerarneqarnera uppernarsarneqanngilaq, atorfinitsitsinissamut ataatsimiitsitaliap ataatsimiitsitaliamilu siulittaasup Søren Starch Nielsenip atorfinitsitsineq nipangiussisussaatitaaneq tunngavilersuutigalugu oqaaseqarfigerusunngimmassuk.
Atorfinitsitsinerlu pissusissamisuunnginnersoq eqqoriartaarneqarsinnaasoq Anita Hofferip tikkuarpaa.
- Naalakkersyuisuusimasut suliani taamaattuni ilumut ammasumik pissuseqarsimanersut eqqoriarneqarsinaavoq. Ilumut atorfinitsitsinissamut ersarissunik piumasaqaateqartarsimanersut, atorfinitsinneqartullu piumasaqaatinik ilumut naammassinninnersut aamma eqqoriaqattaarneqarsinnaavoq, Anita Hoffer KNRimut oqarpoq.
Anita Hofferip aamma oqaatigaa imaattariaqanngitsoq ilisarisimasanik atorfinitsitsineq tamatigut ajornartorsiutitaqassasoq, tassami suleqatigiilluarsinnaaneq pingaaruteqarmat. Taamaattorli ilisarisimasanik atorfinitsitsiniaraanni ammasumik pissuseqarnissaq pisariaqartoq kiisalu atorfinittup piumasaqaatinik ilumut naammassinninnera takuneqarsinnasariaqartoq naqissuserlugu. Tassami atorfinitsitsinissamut aliangernermi ilisarisimaqatigiinneq tunngaviussanngimmat, piginnaasalli aallaavigalugit atorfinitsitsineq pisariaqarmat.
