Anisitaasunut inissiigallartarfik Nuummi atoqqaarfissiortinneqarpoq

Namminersorlutik Oqartussat, Inissiaatileqatigiiffik A/S INI taamatullu Kommuneqarfik Sermersooq peqatigiillutik, innuttaasut ineqarnerminnut atatillugu isumaqatigiissutinik naammassinnissinnaanngitsunut anisitsinermi taakku inissaqartinneqarnissaat maanna periarfissaalerpoq.

Knud Kristiansen interviewes i genhusningscenteret

Allattoq Apollo Jeremiassen

januaarip 28-at 2015 14:48

Ilaqutariit A/S Inissiaatileqatigiiffimmit ineqartinneqartut isumaqatigiissutinik naammassinnissinnaasimanngitsut anisitaaneranni inissaqartinneqarnissaat, Namminersorlutik Oqartussanit maanna aaqqiivigineqarpoq, tassa anisitaasunut inissiigallartarfimmik ullumi Nuummi ammaasoqarmat.

Aamma atuaruk Nuummi inigisaminnut akiliisinnaajunnartunut inissiigallartarfik ullumi ammarneqassaaq

Ineqarnermut Naalakkersuisoq, Knud Kristiansen ammaanersiornermi oqalugiarluni oqarpoq, anisitaasunut inissiigallartarfik pisariaqartinneqarmat, illorsuaq 240 kvadrat meterisut angitigisoq, 9,1 millioner koruuninillu akeqartoq maanna sananeqareerluni atorneqarnissaminut piareertoq.

Inissisiaatileqatigiiffimmit INI A/S-imi ineqartut isumaqatigiissutinik naammassinnissimanngitsut, inissiigallartarfinniisinneqarnerminni ullormut 50 koruunit 100 koruunillu akornanni akiliisassasut, Ineqarnermut Naalakkersuisoqarfimmi pisortap, Olafur Nielsenip KNR-imut oqaatigaa.

Ineqarnermullu Naalakkersuisoq, Knud Kristiansen aamma oqarpoq, Nuummi inigisaminnit anisitaasut inissiigallartarfeqalernerat assigalugu illoqarfinni allani taamaattunik sanaartortoqarnissaa kissaatigisami annerpaatarigaat.

Aamma atuaruk Akiliisinnaajunnaartut inissiassaat sanaartorniarneqalerpoq

Nuummi anisitaasunut inissiigallartarfik arfinilinnik ineeqqanik pilersugaavoq, ineeqqanilu arfinilinnik siniffeqarluni. Ineeqqat tamarmik videomik assiliissummik aamma pilersugaapput.

Inissiigallartarfik ataatsimik sulisoqassaaq, taassuma suliarissallugu tassani nakkutiginninneq.