Aningaaseriviup pisortaa: Aningaasaqarneq aqunneqarnerusariaqarpoq

Kalaallit Nunaata aningaasaqarnikkut ingerlanneqarnera pitsaanerulissappat inatsisartunngortussat aningaasaqarnikkut ingerlatsineq sukannersumik aquttariaqarpaat, pilersaarutillu ukiut marluk pingasulluunniit ingerlasussat akuerisariaqassallugit. Sparbankip Kalaallit Nunaanni immikkoortuata pisortaa Anne-Grethe Laursen taama oqarpoq:

- Pisortat, tassa Namminersornerullutik Oqartussat kommunillu aningaasartuutaat qiviassagaanni maluginiarpara aningaasartuutit isertitallu assiginngissuteqartut. Isertitat aningaasartuutinut naleqqiullugit ikinnerupput, Sparbankip pisortaa Anne-Grethe Laursen Radioaviisimut oqarpoq.

Aningaasartuutit ikilisarneqartariaqarput, isertitallu amerlineqarlutik. Taamaattoqassappat inuussutissarsiutitigut periarfissat pitsaanerusariaqarput, Sparbankip pisortaa oqarpoq, ilinniartitaanerlu piorsaavigineqartariaqartoq aamma ujartorlugu.

- Sulisorpassuit ilinniarsimasuunngillat, isertitakitsuullutik. Tamanna pissutaalluni inuiaqatigiit akileraarutitigut isertitaat killeqarput. Sulisut ilinniarsimasut amerlanerulerpata atorfigissaarnerulissapput akissarsiagissaarnerulissallutik inuiaqatigiillu akileraarutitigut isertitaat amerlissallutik, Anne-Grethe Laursen oqarpoq.

Aningaasaqarnikkut ingerlatsineq pillugu pilersaarummik naalakkersuisunngortussat piaartumik pilersitsisariaqarput:

- Aningaasarsiornikkut nunarsuarmi ajalusoortoqarpoq, naallu Kalaallit Nunaannut sunniuteqangaanngikkarluartoq aningaasaqarnikkut ingerlatsineq pillugu pilersaarummik piaartumik pilersitsisoqartariaqarpoq. Pisortat aningaasartuutaat isertitanut naleqqiullugit ikinnerupput, taamaamaammt aningaasaqarniarnikkut aaqqivigisassat piaartumik isumagineqartariaqarput, Anne-Grethe Laursen Radioaviisimut oqarpoq.

Aningaasaqarnikkut ingerlatsineq pillugu naalakkersuisut nalunaarutaanni siunniussat piviusunngortinneqassappat maannangaaq iliuuseqartoqartariaqarpoq, pilersaarutillu ukiut marluk pingasulluunniit ingerlanerini piviusunngortinneqartariaqarlutik, Sparbankip pisortaa Anne-Grethe Laursen naggasiilluni oqarpoq.