Aningaasatigut aqutsinerliorneq pisortallu taarsernerat aningaasarliornermut peqqutaatinneqarput
Aningaasanik aqutsinerliorneq pisortallu taarsernerat Kommuneqarfik Sermersuumi pisortaanerup Steffen Ulrich-Lyngep nakkutigineqalernerminnut peqqutaatippai.
2013 immikkooqqissaarpoq, pisortaanerit arfinillit atorfinitsinneqarsimapput, tamatumalu kingunerisaanik ukiup affaani siullermi aqutsineq iluarsimanngilaq aningaasartuutillu qaffasippallaarsimallutik. Pisortaanerit ukioq manna inissereerput, sipaarniarfissavullu suliaralugit aallartereerlutigit. Kommuneqarfik Sermersuumi pisortaaneq Steffen Ulrich-Lynge taama oqarpoq.
Aperaarput pisortaanernik atorfinitsitsiortornerit siumoorluni naatsorsuutinut ilanngunneqareersimasinnaannginnersut nakkutigineqarnissaq pinngitsoortinniarlugu, imalu akivoq:
-Kommuni siorna pisortaqanngivissorsimavoq, tamannalu immikkuullarilluinnartuuvoq. Kisianni taamaalisoqaqqinnavianngilaq aamma toqqissisimanerusumik ingerlassaagut.
Aamma oqarpoq ukiut siuliini aningaasat isertitanut naleqqiullugit amerlanerusut atorneqartarsimammata sipaarniartariaqassallutik tamannalu innutaasunit aamma maluginngitsoorneqarnavianngitsoq.
-Sipaarniarneq innuttaasunut soorunami sunniuteqrtussaassaaq, sipaarniarnerli nutaajunngilaq. Siornali missingersuusioratta sipaarniarfissanik aalajangersaareerpugut, Steffen Ulrich-Lynge erseqqissaavoq.
Kommuneqarfik Sermersuup karsimiittuutaasa siorna decembarip 31-ani 23 millionit koruuniunerat Aningaasaqarnermut Nunamullu Namminermut Naalakkersuisoqarfiup nakkutiginnilerneranut tunngaviupput.