Aningaasaqarniarneq: Sukaterinissaq suli pisariaqarpoq

Taama nalunaaruteqartoq tassaavoq aningaasarsiorneq pillugu aningaasaqarnermut siunnersuisoqatigiit siulittaasorigallagaat Nationalbankip pisortaata tullia Anders Møller Christensen.

- Aningaasarsiornermi politikki suli sukatertariaqarpoq 1 milliard koruunit naligannut, taamaasiornikkut akiitsut amerligaluttuinnarnissaat pinngitsoorneqarsinnaaniassammat, Anders Møller Christensen oqarpoq.

Aningaasaqarnermut siunnerusoqatigiit Naalakkersuisut 2009-mi pilersippaat. Taakku ukiut tamaasa aningaasarsiornerup allanngoriartornera nalilersortarpaat aammalu nalilersortarlugu aningaasarsiornikkut aqutsineq akisussaassuseqartumik ingerlanneqarnersoq.

Inuussutissarsiornikkut toqqammavissat annikimmata aalisarneq pingaarnertut isumalluuttaavoq tamannalu pissutigalugu ukiut aggersut ernumanartoqarsinnaasut siunnersuisoqatigiit isumaqarput, taamaattorli ajutoortoqalerneraanissamik kalerrisaarisoqanngitsoq Aningaasaqarnermut Siunnersuisoqatigiit nalunaarput.

- Ineriartornerup erseqqissarpaa Kalaallit Nunaanni aningaasarsiornermi toqqammavik qajannartoq, taamaattumillu eqqorneqarsinnaaneq qaninneruvoq inuiaqatigiit akiitsui amerlissappata. Una ajutoortoqalerneranut kalerrisaarutaanngilaq, uanili ersersinniarneqarpoq aningaasarsiornikkut toqqammaviit siamasinnerusut aamma ilinniartitaanerup pitsaanerunissaa, Anders Møller Christensen oqarpoq.

Aningaasarnermut Siunnersuisoqatigiit ilisimatitsissutigaat nunatsinni innuttaasut agguaqatigiisillugu 50.000 koruuninik pisortanut akiitsoqartut, nunanulli avannarlernut sanilliullugu tamanna annikinnerusoq. Anders Møller Christensenillu nalunaarusiaminni eqikkaanertik uterfigaa:

- Ajoriinnagassaanngilaq, kisianni aamma taama pitsaatiginngilaq. Imatut paasillugu suli pitsanngoriarnissamut periarfissaqarpoq, Aningaasaqarnermut Siunnersuisoqatigiit siulittaasorigallagaat Nationalbankip pisortaata tullia Anders Møller Christensen oqarpoq.