Aningaasaqarnermut Siunnersuisoqatigiit: Aaqqissuusseqqinnissat pisunit kinguarsarneqarput
Nunatta aningaasarsiornerata ukioq manna appariaateqarsimanera - soorlu 2012-imi aamma 2013-imi taamaassimasoq - taassuma eqqaasitsissutigaa.
Aalisarnermi isertitat ikiliartornerat, aatsitassarsiorumasut ikiliartornerat, takornarniartitsinermilu isertitat ikiliartornerat pissutaasut, Aningaasaqarnermut Siunnersuisoqatigiit nalunaarummi kingullermi allaaseraat.
AAMMA ATUARUK Aningaasaqarnermut Siunnersuisoqatigiit: Nalimmassaaneq mianernarpoq
- Missingersuutit amigaartoorfiunnginnissaat pillugu suliniapiloortoqarpoq, aningaasarsiorneq unittooqqavoq, suliffissaaleqineq ajornartorsiutaaqaaq, nunalu ataatsimut isigalugu periarfissat assigiinngeqalutik, Torben M. Andersen, Danmarkip Radioanut oqarpoq.
Nunatsinnilu aningaasarsiorneq ilorraap tungaanut sangutinneqassappat, immikkut aallunniagassat pingaarutillit pingasuusut oqaatigalugu; Tassaasut aatsitassarsiorneq, ilinniartitaaneq nuttarnerlu.
Aalluttariaqakkat pingasut tikkuarpai
Immikkut aallunneqartariaqartut taakku pingasut, Inatsisartunut novembarip ulluisa 28-anni qinersisoqarnissaata tungaanut oqallisigineqarluarumaartut Torben M. Andersenip neriuutigaa.
- Siunissaq ungasinnerusoq eqqarsaatigalugu qulaani taakkartukkakka pingaaruteqarput, qineqqusaarnerullu nalaani taakku oqallisineqarumaarnersut neriuutigiinnarsinnaavara, Aningaasaqarnermut Siunnersuisoqatigiit siulittaasuat Torben M. Andersen, Danmarkip Radioanit apersorneqarluni oqarpoq.