Aningaasaqarnermut naalakkersuisup ineqarnermut politikkini aalajangiusimaannarpaa
Aningaasaqarnermut Siunnersuisoqatigiit ukiumoortumik nalunaarusiaminnik ippassaq saqqummiigamik allannguisoqartariaqarneranik oqaaseqareersut, ineqarnermut politikkip maanna ingerlanneqartup allanngortinneqarnissaanik pilersaaruteqanngitsoq, aningaasaqarnermut naalakkersuisup Vittus Qujaukitsup oqaatigaa.
Iluarsineqarsinnaasunilli nalilersuiffigineqarsinnaasunillu peqartoq, inissianulli aningaasaliinissaq akilersinnaasariaqartoq, aningaasaqarnermut naalakkersuisoq isumaqarpoq.
Aamma atuaruk Ineqarnermut politikki pisuunuinnaq iluaqutaasoq
Pigisanut akileraarutinik allannguisoqaranilu ilanngussisoqassanngilaq
Vittus Qujakitsup Aningaasaqarnermut Siunnersuisoqatigiit ukiumoortumik nalunaarusiaat atuareerlugu, isornartorsiuinerat isumaqatiginnginnerarpaa allannguisoqarnissaanillu pilersaaruteqartoqannginnera erseqqissaatigalugu.
- Aningaasaqarnermut Siunnersuisoqatigiit naliliinerat isumaqatiginngilara, kipparippallaartutullu isigalugu. Innuttaasut inissianik imminnut pilersorsinnaanissaat, aammalu initaarnissap pilerinartuunissaa kissaatigaarput, KNR-imut oqarpoq nangillunilu:
- Kisianni taamatut oqareerlunga nassuerutigissavara, pisortat qularnaveeqqusigaannik taarsigassarsisarnermut allatigullu aaqqissuussinerit aqqutigalugit aningaasarsiornissamut iluanaarniapilunnissamullu periarfissat amerlavallaarmata. Tamakkulu maanna killiliffiginissaat pisariaqarpoq.
Aamma atuaruk Siunnersuisoqatigiit: Naalakkersuisut aallartittariaqalerput
- Taamaattumik ineqarnerup aaqqissuussiffigneqarnissaa pillugu tamakkuupput aappaagu sammisassagut. Taamaaliornikkut pisariaqartitsisunuinnaq aningasat qularnaveeqqusikkat taavalu pisortat taarsigassarsinissamut periarfissiissutaat taamatullu erniatigut ilanngaateqartarnermut periarfissat, Naalakkersuisunit suliniutigaarput.
