Aningaasaqarnermi unammilligassat utaqqipput
2009-imi aningaasaqarnernikkut ingerlatsineq pillugu nalunaarut Naalakkersuisut saqqummerseqqammerpaat. Aningaasarsiornikkut ingerlatsinerup sukaternisaa pisariaqarluinnarpoq. Nunatta Karsia piffissami 2007-imiit 2009 ilanngullugu katillugit 877,5 millioni koruuninik amingartoorpoq. Ingerlatsinermi aningaasartuutit ikilisariaqarnerisa saniatigut aamma nunani tamalaani aningaasarsiornikkut ajornartorsiorneq, Nunatta aamma avaqqutiinnarsinnaanngisaa, eqqaaneqarpoq.
Tassami nunarsuarmi aningaasaqarnikkut ajornartoornerup malitsigisaanik aningaasnik atorniarneq ajornakusoornerulersimavoq, taamaammallu aamma aatsitassarsiorniarluni pilersaarutit ilaat kinguartinneqarsimallutik ilaallu unitsikkanneqarsimallutik.
Ingerlatsinermi aningaasartuutit isertitanit amerlanerujartuinnarnerat unikaallatinniarlugu nalunaarusiami siunnersuutigineqarpoq, sulisinnaasut ilinniarteqqinneqassasut inuussutissarsiutinilu ineriartorfiusuni sulilissasut. Aalisartut piniartullu inuussutissarsiutinut nutaanut nuuttariaqarnerat, nalunaarusiami immikkut eqqqaaneqarput. Taamaaliorpata ilaqutariit aalisartukkormiut piniartukkormiullu isertitaat qaffassapput, taamaalillutillu akileraarutitigut isertitat, atugarissaarnermut iluaqutaasussat, aamma qaffassallutik.
Namminersornerup juunip 21-ani eqqunneqaranut atatillugu aamma aningaasartuutissanik nutaanik takkuttoqarsinnaavoq. Danskit aningaasarsiornrmut ministereqarfiata missiliorpaa, suliassaqarfiit, Namminersornerup piareersimaleruni tigusinnaasaa, naalagaaffiup ullumikkut 300 millioni koruuninik aningaasartorfigisarai.
Ukiuni tulliuttuni aningaasarsiornikkut unammilligassat akornanni Namminersornerullutik Oqartussat tamakkiisumik ilaannakortumilluunniit pigisai nalunaarummi aamma taaneqarput.
Royal Greenland aamma Air Greenland assersuutigineqarput, aningaasarsiornikkut ajornartooqqanermi nunarsuarmilu niuffannermi unittooqqanermit sunnerneqarsinnaasut.
