VIDEO Aningaasanut inatsisissaq atsioqatigiissutigineqartoq

Jens Immanuelsenip Siumumeerup, Tillie Martinussenip Uldumip partiianeersup Steen Lyngellu Atassummeersup aningaasanut inatsisissaq akuersissutigalugu ullumi atsioqatigiissutigaat.

Partiit illuatungiliuttuusut Inuit Ataqatigiit Partii Nalerarlu isumaqatigiissummik taamaasillutik atsioqataanngitsoorput.

Aningaasaqarnermut naalakkersuisup naalakkersuisooqatigiit suliaq pillugu isumaqatigiissimanerannut kingorna qujassuteqarfigai.

- Partiit naalakkersuisooqataasut isumaqatigiissuteqarnissamut piumassusermik takutitsinerat naammagisimaarpara. Isumaqatigiinniarnernimi kinguneqartussamik suleqataarusussuseqarsimanngitsuuppata aningaasanut inatsit inuussutissarsiutinik siuarsaanissamut, inuusuttut suliffissaaleqinerannik akiuiniarnissamut inuiaqatigiinnilu aaqqissuusseqqinnissanut ingerlanniakkatsinnut aningaasanik amerlanerusunik imaqartoq saqqummiussinnaasimassanngikkaluarparput, aningaasaqarnermut aatsitassanullu naalakkersuisoq Anda Uldum taama oqarpoq.

Aningaasanut inatsisissaq Inartsisartuni maajip aqqaneq-aappaani pingajussaaneerneqassaaq.