Aningaasanut inatsissap naammassineqarnissaa sulissutigineqaleruttorpoq

Aningaasanut inatsisip aappaagumoortup pingajussaaneerlugu Inatsisartuni tallimanngorpat oqallisigineqannginnerani, aningaasaqarnermut akileraartarnermullu ataatsimiititaliamit tamanna ullumi kingullermeerlugu ataatsimiissutigineqattaarpoq.
Assi © : KNR
novembarip 17-at 2015 15:05

 

Naalakkersuisut allannguutissatut siunnersuutaat arlallit pingaarnertut ataatsimiititaliamit eqqartorneqarsimasut, ataatsimiititaliap siulittaasuanit, Jens Immanuelsenimit oqaatigineqarpoq.

- Oqaluuserisagut assigiinngitsuupput. Ilaatigut naalakkersuisut erseqqinnerusumik nassuiaateqarnissaat piumsarineqarluni, tamannalu isumaliutissiissutitta suliarineqarnissaa sioqqullugu tamassuma tunniunneqareernissaa piumsaaralutigu, Jens Immanuelsen oqarpoq.

Suli isertuunneqarallassapput

Suulli piumasarineqarsimanersut, Jens Immanuelsenip itisilerusunngikkallarpaa.

- Suut piumasarisimanerlutigit ataasiakkaarlugit taagussanngilakka. Tamassumunnga pissutaavoq ataatsimiititaliap isumaliutissiissutissaa suli atsiorneqanngimmat, Jens Immanuelsen oqarpoq.

Aamma atuaruk Inatsisartut aningaasanut inatsisissaq isumaqatigiissutigingajalerpaat

Aamma Inuit Ataqatigiit ataatsimiititaliami ilaasortaatitaata, Naaja Nathanielsenip oqaatigerusunngikkallarpaa, suut ataatsimiititaliami eqqartorneqarsimanersut.

- Inuit ataqatigiit tungaanniit amigaatigisatut suli tassaapput, kommunini inunnik isumaginnittut ataasiakkaat qanoq amerlatigisunik sullittagaqarnerinnut tunngasut aammattaaq amigaatigalutigit efterskolet højskolillu annertunerusumik salliunneqarnissaannut tunngasut taamatullu suliffeqarfiit meeqqanik inuusuttuaqqanillu sullissut pingaartinnerunissaannut tunngasut amigaatigalutigit.

Naaja Nathanielsen aamma oqarpoq, inuusuttut susassaqartinneqarnissaannut atatillugu Namminersorlutik Oqartussanik periarfissatut atorneqartoq, tassalu Piareersarfiit atorneqartarnerisa saniatigut, efterskolenut, højskolenut allallunullu inunnik isumginninnermik suliaqartunut aningaasanik 8 millioner koruuninik immikkortiffigineqarnissaat, Inuit Ataqatigiinnit piumasarineqarpoq oqarlutik aningaasat Piareersarfinnut atorneqartartunit tiguneqartariaqanngitsut.

Aamma atuaruk IA: Qalerallit pillugit akitsuut tamakkiisuunngilaq

Aamma IA-p tusarliukkusunngilaa suut oqallisigineqarsimanersut

Ataatsimiitalialli ulluni makkunani ataatsimeeqattaarneranni isumaqatigiinniutigineqartut pillugit imatorsuaq assortuuttoqarsimanngitsoq, Naaja Nathanielsenip ilanngullugu KNR-imut oqaatigaa.

- Ataatsimiinnitta nalaani assortuuttoqanngilaq oqaatigisinnaavarali allannguutissatut siunnersuutit ilaat annikikkaluamik allanngortinneqarput, taamaattumik oqartariaqarpunga tamanna pitsaasutut isigineqarsinnaasoq.

Inuit Ataqatigiit sinnerlugit aningaasaqarnermut akileraartarnermullu ataatsimiititaliami ilaasortaq, Naaja Nathanielsen oqarpoq.

Taanna aamma oqarpoq, ataatsimiititaliap isumaliutissiissutaa nalunaaquttap akunneri arlaqanngitsut qaangiuppata atsiorneqareersimalluni tunniunneqareerpat, tamassumalu Inatsisartuni pingajussaaneerneqartinnagu, allannguutissanik allanik Naalakkersuisut tunniussaqarsinnaanerat naatsorsuutigineqarluarsinnaasoq.