Aningaasanut inatsisissaq siullermeerneqarpoq

Akit assigiikkunnaarnissaasa qaammatit pingasut qaangiuppata atuutilersinnissaat ilimanarsigaluttuinnavippoq. Siumup siulersuisuunerisa inatsisartunilu ilaasortaasa ippassaq akuersaarpaat, innaallagissap, erngup kiassarnerullu akiisa ukiortaamit allanngortinneqarnissaat.

Akit assigiikkunnaarnissaat aappaagumut aningaasatigut inatsisissap inatsisartuni ullumi oqaluuserineqarneranut atatillugu oqaluuserineqassaaq.

Akit assigiigunnaarnissaat sinerissamut tusarniaassutigineqarmalli akissutit qaammatip aappaata qeqqa qaangiuppoq kommuninit, peqatigiiffinnit suliffeqarfinnillu uterterarneqarmata. Akissutit ilisarnaatigaat iluarsaaqqinniarneq akuersaarneqarmat, kisianni ukiumit nutaamit atulersinniarneqarnera siusigineqarluni, amerlasuullu siunnersuutigaat ukiumik ataatsimik kinguartinneqarnissaa.

Kinguarteqqusisut tassaapput kommuneqarfiit kattuffiat KANUKOKA, Sulisitsisut Peqatigiiffiat GA aalisakkanillu suliffissuit namminersortut.

Siumukkormiut ippassaq unnukkut ataatsimiinnerata kingorna Siumup siulittaasua, Hans Enoksen oqarpoq ataatsimiinneq eqeersimaartumik oqalliffiulluarlunilu pisimasoq. Siumukkormiullu ilaasa kinguartitsinissaq kissaatigigaluaraat, amerlanerit ukiortaamit atuutilernissaa isumaqatigigaat, Hans Enoksen oqarpoq.

Taamaalilluni nalunarunnaarpoq akit assigiikkunnaarnissaannik akileraarutillu allanngortinnissaannik siunnersuut inatsisartut ukiortaamit atuutilersissagaat. Siumut, IA, Demokraatillu akit assigiigunnaarnissaanut isumaqataanertik nalunaarutigisareerpaat.

Inatsisartut 2005-imut aningaasanut inatsisissaq ullumi siullermeerlugu oqaluuserilerpassuk ilinniartitaanermut kulturimullu ukiuni tulliuttuni 200 millioni koruuninik aningaasaliinerunissaq aamma aalisarnerup ineriartortinneranut 20 millioni koruuninik ukiumut aningaasaliisalernissaq ilaatigut siunnersuutaapput. Assigiimmik akeqartitsinerup atorunnaarsinneqarneratigut innuttaasut 60 millioni koruuninik sipaaruteqalissasut, akileraarutillu allanngortinnerannut atatillugu 31 millioni koruuninik sipaaruteqalissasut ilimagineqarpoq.

Sanaartornermut iluarsaaqqinnernullu aningaasaliissutisut amerliartuinnartut ukiuni tulliuttuni aamma amerleriassangatinneqarput.