Aningaasanut inatsimmi aningaasaliissutit Sorlaap pakatsissutigigai
Aappaagu aningaasaliissutit taamaginnassasut, Naalakkersuisut siunnersuutigaat, taamaammallu siunnersuisoqatigiit akerliliipput.
- Sorlak qalipaatersorfiunngimmat partiit inuusuttai suleqataalluinnarlutik ineriartortitseqataapput, annertuumillu aningaasatigut eqqorneqareertoq suli qaavatigut eqqorneqaqqissappat ingerlaqatigiinneq nukilaassissasoq naatsorsuutigineqarpoq, siulittasuugallartoq Paninnguaq Kristensen taassumalu tullia Qulutannguaq Berthelsen allapput.
Meeqqat inuusuttullu siunnersuisoqatigiiffiat nunarput tamakkerlugu 3000-it missaani ilaasortaqarpoq, ukiullu tamarluinnaasa ilaasortaminik pikkorissaasarlunilu isumasioqatigiissitsisarpoq.
Aamma Nunatsinni inuusuttut meeqqallu pillugit suliniarfinni assigiinngitsuni peqataanermik killilerneqarsinnaanera ernumassutigaat. Assersuutigalugu Kalaallit Nunaanni ICC-p inuusuttaanni, imminut toqunissamik pinaveersaartitsiniarnermi, Inuit pisinnaatitaaffiinut ataatsimiititaliami atuakkiornerlu pillugu suliami Allattami suleqataapput.
Sorlammut aningaasaliissutinit 150.000 koruunit inuusuttunut ukiut tamaasa højskolertitsisarnernut immikkortitaapput.