Aningaasanut inatsimmi 50 millionit sipaarniarpaat

Aningaasaqarnermut Aatsitassanullu Naalakkersuisoq Anda Uldumip, erseqqissumik oqaatigiumanngilaa aningaasat suminngaanneersut sipaarniarfigineqassanersut. Soraarsitsiortortoqassanngitsoq neriorsuutigisinnanngilaa, taamaallaalli kommunit pilliuteqassanngitsut oqaatigalugu.

Maannangaarli oqaannarpoq, Namminersorlutik Oqartussat ingerlatsivii sipaarniutissanik ujarlissasut.

-Kommunit sipaarniarnikuusut ukiuni kingullerni ilisimareerparput, taamaammat taakku pilliuteqarnikuupput. Una Namminersorlutik Oqartussat ingerlatsiviini 50 millioner koruunit sipaarniutigineqassasoq siunniussimavarput, aamma taanna piviusorsiortuuvoq anguneqarsinnaasoq, Anda Uldum KNR-mut oqarpoq.

Aamma atuaruk Anda Uldum: Ataatsimoorluta qajaq makitissavarput

Ilanngullugulu oqaatigaa, 2014-mi aningaasanik atuineq annikinnerummat, tassuunatigut sipaarniarneq matussuserneqarsinnaasoq naatsorsuutigalugu.
Aningaasaqarnermut inatsimmi siunnersuutigineqartoq, ukiup tulliani suli sipaarniarneq annertunerussasoq oqaatigalugu.

-Una aningaasanut inatsit sakkortulaarsinnaavoq, tullia suli sakkortunerusariaqassooq unammilligassagut taama annertutigitillugit, Anda Uldum oqarpoq.

Oqaatigaalu, innuttaasut arlaatigut pilliuteqaqataasariaqassasut, sulili oqaatigisinnannginnerarlugu qanorpiaq pilliuteqartoqassanersoq. Sipaarniarnermullu atatillugu ilimaginnginnerarpaa soraarsitsiortortoqassasoq.

-Taanna oqaaseqarfigisinnaanngilara, kisianni ilimaginngilara una soraarsitsiortornermik una kinguneqassasoq, Aningaasaqarnermut Aatsitassanullu Naalakkersuisoq Anda Uldum oqarpoq.

Aningaasanut Inatsit aappassaaneerneqarnerani imaluunniit pingajussaaneerneqarpat, aningaasat suminngaaniit aaneqassanersut saqqummiunneqassasut erseqqissaatigaa.